الماتىدا اتالىپ وتكەن "اقجەلكەن" بالالار باسىلىمىنىڭ 100 جىلدىعى قارساڭىندا ءسۇيىنشى جاڭالىق جاريا بولدى، دەپ حابارلايدى aqshamnews.kz ءتىلشىسى.
بۇل جاڭالىق - 1 عاسىر بويى ارحيۆتە جاتقان، اراب قارپىمەن جازىلعان جۇسىپبەك ايماۋىت ۇلىنىڭ بۇرىن-سوڭدى ەش جەردە جاريالانباعان «بالالارعا اڭگىمە» دەپ اتالاتىن اڭگىمەلەر توپتاماسىنىڭ تابىلۋى.
جۋرنالدىڭ 1925 جىلى ورىنبوردا «پيونەر» دەگەن اتپەن جارىق كورگەن ەڭ العاشقى سانىنا «جىك» دەگەن بۇركەنشىك اتپەن جاريالانعان جازۋشىنىڭ بۇل شىعارمالارىن رەداكسيا ءتىلشىسى اينۇر مۇراتوۆا الماتىداعى ۇلتتىق كىتاپحانادان تاپقان.
"جۋرنالىمىزدىڭ 1925-1939 جىلدار ارالىعىنداعى نومىرلەرىنە شولۋ جاساۋ بارىسىندا 1 عاسىر بويى ارحيۆتە جاتقان اراب قارپىمەن ياعني توتە جازۋمەن جازىلعان جۇسىپبەك ايماۋىت ۇلىنىڭ بۇرىن-سوڭدى ەش جەردە جاريالانباعان «بالالارعا اڭگىمە» دەپ اتالاتىن اڭگىمەلەر توپتاماسىن تاپتىق.
جازۋشىنىڭ بۇل شىعارمالارى قازىرگى «اق جەلكەن» جۋرنالىنىڭ 1925 جىلى ورىنبوردا «پيونەر» دەگەن اتپەن جارىق كورگەن ەڭ العاشقى سانىنا «جىك»دەگەن بۇركەنشىك اتپەن جاريالانىپتى.
ءجۇز جىل بويى راسىمەن دە مۇنداي قازىنا عىلىمي تۇرعىدا زەرتتەلمەي جاتۋى، جۇسىپبەك ايماۋىت ۇلى شىعارمالارى جيناقتالعان كىتاپتارعا ەنبەۋى مۇمكىن ەمەس دەپ، كىتاپحانالارداعى جۇسىپبەك ايماۋىت ۇلى شىعارمالارى جيناقتارىنىڭ ءبىرىن قالدىرماي قاراپ شىقتىم. ءبىراق ءدال «پيونەر» جۋرنالىنىڭ 1 سانىنا شىققان اڭگىمەلەر توپتاماسىن ەش جەردەن كەزدەستىرمەدىم. بۇل شىعارمانى جۇسىپبەك شىعارماشىلىعىن تەرەڭ زەرتتەپ جۇرگەن جازۋشى، جۇسىپبەكتانۋشى نۇرجان قۋانتايۇلىنا ۇسىنىپ، عىلىمي ساراپتامادان وتكىزۋىن ءوتىندىم. عالىم جان-جاقتى زەردەلەپ، شىعارمانىڭ شىنىمەن دە جۇسىپبەك ايماۋىت ۇلىنىڭ قالامىنان تۋعانىن راستاپ بەردى.
وسىلايشا، عاسىرلىق تاريحتىڭ تاساسىندا قالىپ كەلگەن دەرەكتەر جاڭعىرىپ، «Aq jelken» جۋرنالىنىڭ شىنايى شەجىرەسى عىلىمي نەگىزدە قايتا ءتۇزىلىپ جاتىر. زەرتتەۋ بارىسىندا قىزىلوردا قالاسىنىڭ ارحيۆىنە جانە رەسەي مەن وزبەكستانداعى ارحيۆتەرگە سۇراۋ سالىپ، قوسىمشا دەرەككوزدەر ىزدەستىردىم. الايدا 1925 جىلى جارىق كورگەن «پيونەر» جۋرنالى ول جاقتاردان تابىلمادى. ەلىمىزدەگى ارحيۆتەردى قاراپ، سوڭىندا جۋرنالدىڭ ەڭ العاشقى ءنومىرىن الماتىداعى ق ر ۇلتتىق كىتاپحاناسىنىڭ سيرەك كىتاپتار جانە قولجازبالار بولىمىنەن تاپتىق. ءبىر عانا ءنومىرى ساقتالىپتى"، دەدى "اقجەلكەننىڭ" ءتىلشىسى اينۇر مۇراتوۆا.