اقتوبە وبلىسىنىڭ ايتەكە بي اۋدانىنا يتاليالىق پرۋس شەگىرتكەلەرى ۇشىپ كەلگەن
قازاقستاندا شەگىرتكە زيانكەستەرىنە قارسى كۇرەس شارالارى اياقتالدى، دەپ حابارلايدى almaty-akshamy.kz
وسىعان بايلانىستى 2،8 ملن گەكتار اۋماقتا وڭدەۋ جۇمىستارى جۇرگىزىلدى، بۇل جوسپارلانعان كولەمنىڭ 110%-ىن قۇرايدى. بارلىعى 15،8 ملن گەكتار اۋماق زەرتتەلدى، ول جوسپاردىڭ 92،4% قۇرايدى.
13 وبلىستا — اباي، الماتى، اتىراۋ، شىعىس قازاقستان، جامبىل، جەتىسۋ، باتىس قازاقستان، قاراعاندى، قىزىلوردا، پاۆلودار، سولتۇستىك قازاقستان، ۇلىتاۋ جانە تۇركىستاندا جۇمىس تولىعىمەن اياقتالدى. ال اقمولا، اقتوبە جانە قوستاناي وبلىستارىندا يتاليالىق شەگىرتكە تۇرىنە قارسى وڭدەۋ جۇمىستارى جالعاسۋدا.
اۋىل شارۋاشىلىعى ۆيسە-مينيسترى ەرمەك كەنجەحان ۇلى ورىنبور وبلىسىنان اقتوبە وبلىسىنىڭ ايتەكە بي اۋدانىنا يتاليالىق پرۋس شەگىرتكەسى ۇشىپ كەلگەنىن اتاپ ءوتتى. اتالعان ماسەلە بويىنشا رەسەي تاراپىمەن بىرلەسىپ زەرتتەۋ جۇرگىزۋ جوسپارلانىپ وتىر.
سونىمەن قاتار، ۆيسە-پرەمەر سەرىك جۇمانعارين رەسەي فەدەراسياسى ۇكىمەتى ءتوراعاسىنىڭ ورىنباسارىمەن جەردى بىرلەسىپ، جەدەل وڭدەۋ ماسەلەسىن تالقىلايتىن بولادى. بۇل ارەكەتتەر شەگىرتكە زيانكەستەرىنىڭ تارالۋىن شەكتەۋ جانە قازاقستانداعى اۋىل شارۋاشىلىعى اۋماقتارىن قورعاۋعا باعىتتالعان.