الماتىدا كورىكتەندىرۋدىڭ جاڭا ەرەجەسى بەكىتىلدى.
قۇجات ەلدى مەكەن اۋماقتارىن كورىكتەندىرۋدىڭ رەسپۋبليكالىق ۇلگىلىك قاعيداسىنا سايكەس ازىرلەندى جانە قالالاردىڭ قازىرگى زامانعى قاجەتتىلىگىن كورسەتەدى، دەپ حابارلايدى Almaty-akshamy.kz
وزگەرىستىڭ ءبىرى قۇرىلىس جۇمىستارىن جۇرگىزۋ ورىندارىن كۇتىپ ۇستاۋ جونىندەگى شارالاردى كۇشەيتۋ.
الماتىنىڭ كوممۋنالدىق ينفراقۇرىلىمدى دامىتۋ باسقارماسىنىڭ باسشىسى دۋلات اشكەنوۆتىڭ ايتۋىنشا، مەنشىك يەلەرى قۇرىلىس الاڭدارىنىڭ قورشاۋىنىڭ دۇرىستىعى مەن تازالىعىن قامتاماسىز ەتۋگە ءتيىس. ولاردا بوتەن جازۋلار مەن سۋرەتتەر، حابارلاندىرۋ مەن جارناما جازىلعان پاراقشالار بولماۋعا ءتيىس. سونداي-اق، جالپى قالا جولى لاستانباس ءۇشىن قۇرىلىس الاڭدارىندا قاتتى جابىنى بار كىرمە جولدار جابدىقتالۋى كەرەك.
قۇرىلىس-جوندەۋ جۇمىستارى اياقتالعاننان كەيىن كورىكتەندىرۋ ەلەمەنتىنىڭ بۇزىلعان تۇتاستىعى مەردىگەرلىك ۇيىمنىڭ ەسەبىنەن قالپىنا كەلتىرىلۋگە ءتيىس. سونداي-اق، قوقىستى تاسىمالداۋعا جانە سۋسىمالى جۇكتەردى برەزەنتپەن نەمەسە باسقا ماتەريالمەن جاپپاي، اشىق كۇيىندە اكەتۋگە تىيىم سالىنادى.
بۇعان قوسا، ۋاقىتشا قۇرىلىسقا قويىلاتىن تالاپتار ناقتىلاندى، قۇرىلىس ورنىن جيناعان سوڭ يەسى بۇرىن الىپ جاتقان جەر ۋچاسكەسىن قالپىنا كەلتىرۋگە جانە كورىكتەندىرۋگە مىندەتتەلەدى. ۋاقىتشا قۇرىلىستىڭ مەنشىك يەلەرىنە كۇنقاعار مەن شاتىر سالۋعا، ىدىس پەن تاۋاردى نەگىزگى ەمەس نىساننىڭ جانىنا جانە ونىڭ شاتىرىنا جيناۋعا تىيىم سالىنادى. سونىمەن قاتار، ۋاقىتشا قۇرىلىس اراسىنداعى ورتكە قارسى الشاقتىقتى جابدىقپەن نەمەسە قالدىقپەن تولتىرۋعا بولمايدى.
«بۇل ەرەجە «تازا قازاقستان» رەسپۋبليكالىق اكسياسىن وتكىزۋ يدەياسىنا ەنگىزىلگەن قالانىڭ قاجەتتىلىگىن كورسەتەدى. بۇل مادەنيەتتى ارتتىرۋ، ءوزىنىڭ جەكە ۋچاسكەسىن، ءۇي ماڭىنداعى اۋماقتى كۇتىپ ۇستاۋ، سونداي-اق قۇرىلىس جۇمىستارىن جۇرگىزۋ. ەرەجە باسشىلىق قۇجات رەتىندە قالاسىنا، تۇرىپ جاتقان اۋدانعا، شاعىن اۋدانعا، ورتاعا دەگەن دۇرىس كوزقاراس تانىتۋعا باعىتتالعان»، - دەيدى دۋلات اشكەنوۆ.
بەكىتىلگەن ەرەجەگە تۇسىنىكتەمە بەرگەن قالانىڭ ءماسليحات دەپۋتاتى ديانا ەرلان قابىلدانعان شارالار الماتىدا ءومىر ءسۇرۋ ساپاسىنا وڭ اسەر ەتەتىنىن اتاپ ءوتتى.
«كورىكتەندىرۋدىڭ جاڭا ەرەجەسى قالامىزدىڭ وزگەلەرگە ۇلگى بولۋىنا كومەكتەسەتىنىنە سەنىمدىمىن. ءاربىر تۇرعىننىڭ تازالىق پەن ءتارتىپتى ساقتاۋداعى ءرولىن ءتۇسىنۋى ماڭىزدى. تەك بىرلەسكەن كۇش-جىگەردىڭ ارقاسىندا بارلىعىنا شىنىمەن دە قولايلى جاعداي جاساي الامىز»، - دەدى ول.
ەستەرىڭىزگە سالا كەتەيىك، 2024 جىلعى 19 شىلدەدە VIII سايلانعان ءماسليحاتتىڭ كەزەكتەن تىس ءححى سەسسياسىندا دەپۋتاتتار الماتى قالاسىنىڭ اۋماعىن كورىكتەندىرۋدىڭ جاڭا ەرەجەسىن بەكىتتى. بۇل شارالار ءقاۋىپسىز، ىڭعايلى ءارى ەكولوگيالىق قولايلى قالالىق ورتا قۇرۋعا باعىتتالعان.