وقۋ-اعارتۋ مينيسترلىگى مەملەكەت باسشىسىنىڭ تاپسىرماسىمەن 2023 جىلدان باستاپ پرەزيدەنتتىك جاستار كادرلىق رەزەرۆىنىڭ ۇلگىسى بويىنشا ءبىلىم بەرۋدەگى وزگەرىستەردىڭ كوشباسشىلارىن ىرىكتەۋ جانە دايارلاۋ جونىندەگى جوبانى ىسكە اسىرۋدا.
بۇگىن استانادا «ءبىلىم بەرۋدەگى جاڭا وزگەرىستەردىڭ 1000 كوشباسشىسى» جوباسى اياسىندا ىرىكتەۋدەن ءساتتى وتكەن ۇمىتكەرلەرگە سەرتيفيكات تاپسىرۋ ءراسىمى ءوتتى.
وقۋ-اعارتۋ ءمينيسترى عاني بەيسەمبايەۆ كادرلىق رەزەرۆكە وتكەن ۇمىتكەرلەرگە ارناعان سوزىندە وتاندىق ءبىلىم ساپاسىن ارتتىرۋ جانە پەداگوگ كادرلاردى كاسىبي دايارلاۋ جونىندەگى نەگىزگى باعىتتارعا نازار اۋداردى.
«وتكەن جىلدىڭ باسىندا وقۋ-اعارتۋ مينيسترلىگى ەلىمىزدەگى ءبىلىم ساپاسىن ودان ءارى ارتتىرۋ ءۇشىن 5 نەگىزگى باعىتتى ايقىندادى. ولاردىڭ ىشىندە مەنەدجمەنتتى نىعايتۋ جانە كادرلىق رەزەرۆتى قالىپتاستىرۋ دا بار. مەملەكەت باسشىسىنىڭ تاپسىرماسى بويىنشا ءبىز «1000 وزگەرىستەر كوشباسشىسى» جوباسىن ىسكە قوستىق. بۇل - وتاندىق ءبىلىم جۇيەسىن دامىتۋدىڭ جاڭا كەزەڭى. سەگىز ايدىڭ ىشىندە سىزدەر ىرىكتەۋدەن ءوتىپ، جەكە، كاسىبي، باسقارۋشىلىق، اناليتيكالىق داعدىلار مەن قۇزىرەتتەرىڭىزدى دامىتتىڭىزدار. ەندى سىزدەر ناعىز كوشباسشىلار رەتىندە ەلىمىزدەگى ءبىلىم بەرۋ جۇيەسىنىڭ ساپاسىن ارتتىرۋعا ءوز ۇلەسىڭىزدى قوسۋلارىڭىز كەرەك. ەڭ باستىسى - بالالارىمىز بەن پەداگوگتەرىمىزگە جايلى جانە ءقاۋىپسىز ورتا قالىپتاستىرۋ»، - دەدى عاني بەيسەمبايەۆ.
جوبانىڭ باستاپقى كەزەڭىندە بارلىعى 8068 ءوتىنىم بەرىلدى. ۇمىتكەرلەر قۇزىرەتتىلىكتى باعالاۋ، ءۇش دەڭگەيلى وقىتۋ، ەلىمىزدىڭ جەتەكشى مەكتەپتەرىندە تاعىلىمدامادان ءوتۋ، قورىتىندى باعالاۋ جانە مينيسترلىك جانىنداعى كوميسسيامەن اڭگىمەلەسۋدەن ءوتتى.
بارلىق بەس كەزەڭنىڭ قورىتىندىسى بويىنشا رەسپۋبليكالىق كادر رەزەرۆىنە 208 كانديدات كىردى. ولاردىڭ اراسىندا استانا قالاسىنداعى ا. سەيدىمبەك اتىنداعى №54 مەكتەپ-ليسەي ديرەكتورىنىڭ وقۋ-تاربيە ءىسى جونىندەگى ورىنباسارى قايرات مۇقاشيەۆ تا بار.
«جوباعا قاتىسۋ - مەنىڭ باسقارۋ ءتاسىلىمدى تۇبەگەيلى وزگەرتتى. مەن بالالارىمىزعا قولايلى جاعداي جاساۋ جانە ۇجىممەن بىرگە قاي باعىتتا داميتىنىمىز تۋرالى ويلانا باستادىم. ەڭ باستىسى، مەنىڭ ويىمشا، بۇل جوبا ارىپتەستەرىمنىڭ بولاشاققا جانە ءوز كۇشتەرىنە دەگەن سەنىمىن ارتتىردى»، - دەپ اتاپ ءوتتى ۇمىتكەر.
رەزەرۆكە الىنعان جاڭا بۋىن مەنەدجەرلەرى ەلىمىزدەگى كادر تاپشىلىعى ماسەلەسىن شەشۋگە ىقپال ەتەدى. سونداي-اق، جاڭا مەكتەپتەردى، ونىڭ ىشىندە «جايلى مەكتەپ» ۇلتتىق جوباسى شەڭبەرىندە سالىنىپ جاتقان مەكتەپتەردى باسقارۋعا جىبەرىلەدى. ۇمىتكەرلەردى ىرىكتەۋ جانە بىلىكتىلىگىن ارتتىرۋ بويىنشا ءىس-شارالاردى نزم ببۇ «پەداگوگيكالىق شەبەرلىك ورتالىعى» وتكىزدى.