اسىرەسە، ماتەماتيكا جانە ورىس ءتىلى مەن ادەبيەتى پاندەرىنىڭ مۇعالىمدەرىنە سۇرانىس جوعارى.
ءقازىر قازاقستان مەكتەپتەرىندە 2817 پەداگوگ جەتىسپەيدى. ونىڭ ىشىندە قالالىق مەكتەپتەردە – 1312، اۋىلدىق مەكتەپتەردە – 1505 مامان. وقۋ-اعارتۋ مينيسترلىگى Informburo پورتالىنىڭ سۇراۋ حاتىنا بەرگەن جاۋابىندا ءمۇعالىم تاپشىلىعى ماسەلەسىن قالاي شەشىپ جاتقانىن ءتۇسىندىردى، دەپ حابارلايدى اlmaty-akshamy.kz.
وقۋ-اعارتۋ مينيسترلىگىنىڭ مالىمەتىنشە، 2024 جىلعى جاعداي بويىنشا كەلەسى پاندەردەن ساباق بەرەتىن مۇعالىمدەر جەتپەيدى:
ماتەماتيكا – 640؛
ورىس ءتىلى مەن ادەبيەتى – 340؛
فيزيكا – 236؛
باستاۋىش سىنىپ – 227؛
حيميا – 204؛
ينفورماتيكا – 199؛
اعىلشىن ءتىلى – 169؛
مۋزىكا – 152؛
تاريح – 149؛
كوركەم ەڭبەك – 143؛
گەوگرافيا – 97؛
بيولوگيا – 72؛
قازاق ءتىلى مەن ادەبيەتى مۇعالىمدەرى – 63؛
باسقالارى – 89."ءمۇعالىم تاپشىلىعى ماسەلەسىن شەشۋ ءۇشىن ەلىمىزدىڭ 4 وڭىرىندە 2022 جىلدان باستاپ قازاقستان رەسپۋبليكاسى ۇكىمەتىنىڭ 2022 جىلعى 13 ماۋسىمداعى № 390 (اتىراۋ، الماتى، ماڭعىستاۋ جانە تۇركىستان وبلىستارى) قاۋلىسىمەن بەكىتىلگەن ارنايى باعدارلاما ىسكە اسىرىلىپ جاتىر. ماقساتتى وڭىرلەرگە بارلىعى 58 پەداگوگ جۇمىسقا ورنالاستىرىلدى (الماتى – 27، اتىراۋ – 8، ماڭعىستاۋ – 9، تۇركىستان – 14). 2023 جىلى 11 ۇمىتكەر اڭگىمەلەسۋ كەزەڭىنەن ءوتتى. قازىرگى ۋاقىتتا وسى ۇمىتكەرلەردى نىسانالى وڭىرلەردە جۇمىسقا ورنالاستىرۋ بويىنشا جۇمىستار جۇرگىزىلىپ جاتىر. بۇل باعدارلاما 2027 جىلعا دەيىن جالعاسادى. سونىمەن قاتار وڭىرلەردە پەداگوگيكالىق ماماندىقتارعا مەملەكەتتىك ءبىلىم بەرۋ گرانتىنا وقۋعا قارجى ءبولۋ بويىنشا شارالار قابىلدانىپ جاتىر"، – دەلىنگەن جاۋاپتا.
سونىمەن قاتار، كەلەسى شارالار جۇزەگە اسىرىلۋدا:
پەداگوگيكالىق باعىتتاردا وقيتىن جوعارى وقۋ ورىندارىنىڭ ستۋدەنتتەرى ءۇشىن ستيپەنديا مولشەرى 58 مىڭنان 67 مىڭ تەڭگەگە دەيىن ۇلعايتىلدى؛
پەداگوگيكالىق ءبىلىمى جوق ادامدار ءۇشىن پەداگوگيكالىق قايتا دايارلاۋ بويىنشا جۇمىس جالعاستىرىلدى؛
جىل سايىن، 2020 جىلدان باستاپ پەداگوگتەردىڭ جالاقىسى 2 ەسە ارتتى.
"پەداگوگتەر جەتىسپەۋشىلىگى ماسەلەسى جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ماماندارى مەن تۇلەكتەرىنىڭ كەلۋى ەسەبىنەن شەشىلەدى. مىسالى، 2023-2024 وقۋ جىلىنىڭ الدىن الا شىعارىلىمى 55 178 ادامدى قۇرايدى (2022 جىلى – 55 330 ادام)، ونىڭ ىشىندە مەملەكەتتىك تاپسىرىس بويىنشا – 9150 ادام. پەداگوگيكالىق ماماندىقتار بويىنشا ماگيستراتۋرا – 9501 ادام، ونىڭ ىشىندە مەملەكەتتىك تاپسىرىس بويىنشا – 3115 ادام. شەكتى دەڭگەيدەن وتكەن تۇلەكتەر دە كونكۋرستىق نەگىزدە جۇمىسقا ورنالاساتىن بولادى. سونىمەن قاتار، پەداگوگتەردى قابىلداۋ ەرەجەلەرىنە وزگەرىستەر ەنگىزىلدى، وعان سايكەس تاجىريبەلى پەداگوگتار ءۇشىن دە، جاس ماماندار ءۇشىن دە تەڭ مۇمكىندىكتەر جاسالدى. مىسالى، جوعارى وقۋ ورىندارىن ۇزدىك بىتىرگەن، جەرگىلىكتى اتقارۋشى ورگانداردىڭ مەملەكەتتىك ءبىلىم بەرۋ تاپسىرىسى بويىنشا وقۋدان وتكەن ادامدار سەرتيفيكاتتاۋدان وتكەنى تۋرالى قۇجات بولعان كەزدە كونكۋرستىق راسىمدەردەن وتپەي جۇمىسقا قابىلدانادى"، – دەپ ەسكە سالدى مينيسترلىك وكىلدەرى.