وتكەن جىل قازاقستان ءۇشىن وڭاي بولماعانى راس. ەلىمىزدە بۇرىن-سوڭدى بولماعان ىشكى ساياسي سىن-قاتەرلەر، ەكسترەمالدى ەكونوميكالىق جانە كۇردەلى سىرتقى ساياسي جاعدايلار ورىن الدى. وتكەن جىل بارلىق قازاقستاندىقتار ءۇشىن تىڭ وزگەرىستەرگە دايىندىقتىڭ وزىندىك سىناعى جانە جاڭارتىلعان قازاقستاننىڭ سيمۆولدىق باستالۋى بولدى. سونىمەن قاتار، ءبىز بىرلىككە بەكەم ەل ەكەنىمىزدى، سانالى تۇردە تاڭداۋ جاساي الاتىنىمىزدى، ءوز ەگەمەندىگىمىز بەن تاۋەلسىزدىگىمىزدى قورعاۋعا، ءادىل قوعام قۇرۋعا جانە ترانسفورماسيا جولىندا العا جىلجۋعا دايىن ەكەنىمىزدى دالەلدەي تۇستىك. 20 قاراشاداعى سايلاۋدا حالىق پرەزيدەنت قاسىم-جومارت توقايەۆتىڭ «ادىلەتتى قازاقستان: ءبارىمىز جانە ءارقايسىمىز ءۇشىن» اتتى رەفورمالىق باعدارلاماسىن قولداي وتىرىپ، سەنىم ءبىلدىردى.
ەكونوميكانى باسقارۋ جۇيەسىن جاڭعىرتۋ جالعاستىرىلۋدا، ەكونوميكادا مەملەكەت مەنشىگىنەن الۋ جانە ءبىرقاتار فۋنكسيالاردى باسەكەلەستىك ورتاعا بەرۋ بويىنشا بۇرىن جاريالانعان كۋرس قايتا جۇزەگە اسىرىلدى. «قازمۇنايگاز» ۇك IPO نارىعىنا شىعۋى، بيزنەستى جۇرگىزۋ جاعدايلارىن جەڭىلدەتۋ جانە اكىمشىلىك كەدەرگىلەردى ازايتۋ شارالارى ىسكە اسىرىلۋدا. حالىقتى الەۋمەتتىك قولداۋدى كۇشەيتۋ بويىنشا شارالار بەلسەندى جۇزەگە اسىرىلدى. حالىقتى اتاۋلى الەۋمەتتىك كومەكپەن قامتۋدى ۇلعايتۋ (اتالعان كومەكتى الۋشىلاردىڭ سانى 750 مىڭ ادام، ال ونىڭ جالپى كولەمى 60 ملرد. تەڭگە) دەنساۋلىق ساقتاۋ جانە ءبىلىم بەرۋ سالاسىنداعى قارجىلاندىرۋ سومالارى دا ءوستى.
ەكونوميكانى ءارتاراپتاندىرۋ، باسەكەلەستىكتى دامىتۋ جانە مونوپولياسىزداندىرۋ بويىنشا ماڭىزدى رەفورمالار تاجىريبەلىك ىسكە اسىرۋ كەزەڭىنە ءوتتى. وسى رەفورمالار اياسىندا، قازاقستانعا شيكىزاتتىق ەمەس سەكتوردى دامىتۋ ءۇشىن بىرنەشە شەتەلدىك كومپانيالار تارتىلدى.
مەملەكەت باسشىسى رەفورمالاردىڭ نەگىزگى باعىتتارىن، ونىڭ ىشىندە تاريفتىك رەتتەۋ اۋقىمىن تومەندەتۋدى، سالىق پەن بيۋدجەت ساياساتىنىڭ تيىمدىلىگىن ارتتىرۋدى، سونداي-اق ەكونوميكانىڭ وندىرىستىك سەكتورىنا بانكتىك نەسيە بەرۋدى ىنتالاندىرۋ ماقساتىندا اقشا-نەسيەلىك رەتتەۋدى بەلگىلەدى. تۇبەگەيلى وزگەرىستەر ساياسي ينستيتۋتتار، ورتالىق جانە ايماقتار اراسىنداعى وكىلەتتىكتەردىڭ بولىنۋىنە، وكىلدى بيلىكتى قالىپتاستىرۋ قاعيداتتارىنا، ەكونوميكالىق قاتىناستارعا اسەر ەتتى. پرەزيدەنتتىڭ جولداۋىمەن جانە كونستيتۋسيالىق تۇزەتۋلەردىڭ قابىلدانۋىمەن رەفەرەندۋمدا ەلدىڭ اۋقىمدى قۇرىلىمدىق ساياسي جاڭعىرۋى ىسكە قوسىلدى.
ساياسي رەفورمالار ەكونوميكانى جاڭعىرتۋعا جانە ءال-اۋقاتتى ارتتىرۋعا مۇمكىندىك بەرەتىن جاڭا ەكونوميكالىق ساياساتتى ىسكە اسىرۋدىڭ بەرىك نەگىزىن قالادى جانە ءبىزدىڭ ەلىمىز ءۇشىن الداعى ونجىلدىقتارداعى وزگەرىستەردىڭ باستاماسى بولدى. ەلىمىزدىڭ قوعامدىق-ساياسي ومىرىندە ءالى دە كوپ نارسەنى وزگەرتۋ كەرەك. ول ءۇشىن ازاماتتىق قوعامنىڭ جانە بيزنەستىڭ بەلسەندى ارالاسىپ قاتىسۋى قاجەت. ازامات، قوعام، بيزنەس پەن مەملەكەت اراسىنداعى تۇراقتى قارىم قاتىناستار جانە اشىق ديالوگ ورىن العان جاعدايدا عانا ناتيجەلى شەشىمدەرگە قول جەتكىزۋگە بولادى.
پرەزيدەنت ق.توقايەۆتىڭ رەفورمالىق باعىتىنا سايكەس، 2023 جىلى ءبىز ءبىرقاتار ەكونوميكالىق رەفورمالاردى جۇزەگە اسىرۋىمىز قاجەت. ال ەندى، ارينە، ەكونوميكانى باسقارۋدىڭ ءىس جۇزىندە تابىستى جۇمىس ىستەۋى ناقتى رەتتەلگەن تەتىكتەردى قاجەت ەتەدى جانە ناتيجەلى جۇمىس ىستەپ تۇرعان ينستيتۋتتاردىڭ تيىمدىلىگىنە بايلانىستى ەكەنى راس.