بريتان عالىمدارى وسىنداي بولجام جاساپ وتىر.
سول ءۇشىن ولار وسى باستان ۆاكسينا جاساۋ ءىسىن جەتىلدىرۋدى قولعا العان، دەپ حابارلايدى Almaty-akshamy.kz.
ماقسات - جاڭا كەسەلگە قارسى ەكپەنى قىسقا ۋاقىت ىشىندە ازىرلەۋدى ۇيرەنىپ، ىندەتتىڭ تارالۋىنا جول بەرمەۋ.
24.kz سايتىنىڭ اقپاراتىنشا، ۇلىبريتانيادا جاڭا ىندەتكە قارسى ۆاكسينا جاساۋ جۇمىسى ۋيلتشير گرافتىعىنداعى پورتون-داۋن زەرتحاناسىندا جۇرگىزىلىپ جاتىر. عىلىمي جوباعا 100-دەن اسا مامان جۇمىلدىرىلعان. ايتۋلارىنشا جاڭا ىندەت 3 جىل بۇرىنعى كوروناۆيرۋس سياقتى جانۋاردان تاراۋى مۇمكىن. وسىنى نەگىزگە الا وتىرىپ ءقاۋىپتى ۆيرۋستاردىڭ ءتىزىمى جاسالعان.
«ءقازىر ءبىز الەمدە جاڭا پاندەميانىڭ تۋۋ ءقاۋىپىن زەرتتەپ جاتىرمىز. بۇل ءبىر جاعىنان ادامداردىڭ قالالارعا كوپتەپ شوعىرلانۋىمەن بايلانىستى. مىسالى، قۇس تۇماۋىن الايىق. كليماتتىڭ وزگەرۋى دە جاڭا ىندەتتىڭ شىعۋ ءقاۋىپىن ارتتىرۋى ىقتيمال. سوندىقتان مۇنداي جاعدايدىڭ الدىن الۋ ءۇشىن عىلىمي زەرتتەۋلەردى كۇشەيتۋىمىز قاجەت»، - دەيدى ۇلىبريتانيا ۇلتتىق دەنساۋلىق ساقتاۋ قىزمەتىنىڭ اتقارۋشى ديرەكتورى دجەنني حارريس.
بريتاندىق عالىمدار تەرەڭ زەرتتەپ جاتقان كەسەلدەردىڭ اراسىندا قۇس تۇماۋىنان بولەك مايمىل شەشەگى، تىشقان بەزگەگى سياقتى ۆيرۋستار بار. ماماندار بۇل اۋرۋلار جاڭا پاندەميانىڭ پايدا بولۋىنا اكەلۋى ابدەن مۇمكىن -دەيدى.
«جاھاندىق جىلىنۋدىڭ سالدارى جىل سايىن كۇشەيىپ كەلەدى. مىسالى ءبىز ماسا مەن كەنە ارقىلى تارايتىن اۋرۋلاردىڭ وزگەرىسكە ۇشىراۋىنا كۋا بولىپ جاتىرمىز»، - دەيدى ۇلىبريتانيا ۇلتتىق دەنساۋلىق ساقتاۋ قىزمەتىنىڭ باس عىلىمي قىزمەتكەرى يزابەل وليۆەر.
عالىمدار جاڭا كەسەلگە قارسى ۆاكسينانى 100 كۇن ىشىندە جاساپ شىعارۋدى ماقسات ەتەدى. ورتالىق ماماندارىنىڭ بۇل ىستە تاجىريبەسى مول. زەرتحانا كونگو-قىرىم قاندى بەزگەگىنە قارسى العاش بولىپ ەكپە جاساپ شىعارعان. ءقازىر ۆاكسينانى سىناۋ جۇمىستارى ءجۇرىپ جاتىر.