ەلىمىزدە باسپانا كەزەگىندە تۇرعان 232 مىڭ ادامنىڭ قۇجاتى زاڭ تالاپتارىنا ساي ەمەس.
سونداي-اق ولاردىڭ 15 مىڭى دۇنيەدەن وزعان ازاماتتار ەكەنى انىقتالدى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى ورتالىق كوممۋنيكاسيالار قىزمەتىندە وتكەن بريفينگتە ءمالىم بولدى، دەپ حابارلايدى Almaty-akshamy.kz.
قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى باۋىرجان قابدولدىڭ سوزىنشە، بۇگىندە تۇرعىن ءۇي كەزەگىندە 646 819 قازاقستاندىق ازامات تۇر. سونداي-اق كەيىنگى جىلدارى ولاردىڭ قاتارى ۇلعايىپ كەلەدى. ونىڭ ايتۋىنشا، 10 جىل ىشىندە كەزەك 6 ەسەگە ارتقان.
"سونىمەن بىرگە حالىق تاراپىنان اتالعان كەزەككە باسپاناسى بار ازاماتتار تۇرىپ جاتقانى تۋرالى كوپتەگەن شاعىم ءتۇسىپ جاتىر. وسىعان بايلانىستى ءبىزدىڭ ۆەدومستۆو سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىمەن بىرلەسىپ، اتالعان ءتىزىمنىڭ زاڭ تالاپتارىنىڭ سايكەستىگىنە تالداۋ جۇرگىزىلدى. ونىڭ ناتيجەسىندە كەزەكتە تۇرعان 96،1 مىڭ ازاماتتىڭ كەيىنگى 5 جىلدا جەكە باسپاناسى بولعانى، 533 ادامنىڭ قازاقستاننىڭ ازاماتتىعى جوق ەكەنى، 91،4 مىڭداي ادامنىڭ تۇرعىلىقتى جەرى كەزەككە تىركەلگەن وڭىرمەن سايكەس كەلمەيتىنى، سونداي-اق 29 مىڭ ادامنىڭ تىركەلمەگەنى جانە 15،6 مىڭ ادامنىڭ قايتىس بولعانى انىقتالىپ وتىر"، - دەدى ول.
ۆەدومستۆو مالىمەتىنشە، ءۇي كەزەگىندە تۇرعان 232 مىڭعا جۋىق ازاماتتىڭ جەكە دەرەكتەرى زاڭ تالاپتارىنا ساي بولماعاندىقتان ولاردى تىزىمنەن شىعارۋعا تۋرا كەلەدى.
"اتالعان ءتىزىمدى تۇگەندەۋ كەزەكتىڭ قوزعالۋ پروسەسىن جەدەلدەتۋگە جانە راسىمەن دە باسپاناعا مۇقتاج ازاماتتاردىڭ قۇقىقتارىن كەز كەلگەن وعاش ارەكەتتەردەن قورعاۋعا مۇمكىندىك بەرەدى"، - دەپ ءتۇسىندىردى باۋىرجان قابدول.