ادامزات بالاسىنىڭ ارمانى بىتپەيدى. بالا كۇنىمىزدەن قيالشىلمىز. ءتىپتى اسەرشىلمىز. ساياحاتتى جانىمىز سۇيەدى. كەي-كەيدە وزگە ەلگە بارۋدى كوكسەيمىز. ءبىراق ءساتى قاشان تۇسەرى بەلگىسىز. سونىڭ ىڭعايى بىلتىر كەلدى. تىلەۋىم ورىندالدى. عىلىمي جوبا بويىنشا اپتالىق ءىسسپار جاسادىق. ىستامبۇل كوشەسىن كەزدىك.
جالپى، دەلەگاسيادا 6 ادامبىز. مىسىر بازارى قاسىنداعى فاتيح اۋدانىنا ايالدادىق. ىلعال اۋا. قارا تەڭىزدى اينالا ۇشقان شاعالا. ارلى-بەرلى جۇرگەن ادامدار. قىزىلدى-جاسىلدى شامدار. ءبىر شەتىندە بالىق اۋلاعاندار ءجۇر. تاماقتاناتىن ورتالىقتار كوپ. ۇيلەر ۇستى-ۇستىنە ورنالاسقان. ويتكەنى قالانىڭ جەر بەدەرى قىرلى-ويلى بولىپ كەلەدى. ءبارى-بارى ەرەكشە.
وسىلايشا اييا سوفيا حرامىنا كەلدىك. جەرگىلىكتى تۇرعىندار مەشىتتى مۇراجاي دەپ اتاپ كەتىپتى. سىرتى قىزعىلت-سارى عيمارات "مەن مۇندالايدى". اۋماعىندا كىسى قاراسى كوپ. ىشكى جاعىن ەكىگە ءبولىپ تەمىر شارباقتار تۇر. قۇلشىلىق ەتۋشىلەر ءارى وتەدى. ال تاماشالاۋشىلار بەرىگى جاعىن كورە الادى. سارعىش وتقا ۇقساعان كوپتەگەن الاۋ شامدار ءىلىنۋلى تۇر ەكەن.
قۇددى تاريحي فيلم كورگەندەي نەمەسە ورتا عاسىرعا تاپ بولعانداي كۇي كەشەسىز. سونداي عاجايىپ شەبەرلىكپەن جاسالعان. شىعىپ بارا جاتقاندا جوعارىعا كوزىم ءتۇستى. بۇرىلىپ توقتاي سالىپ، كوز جىبەردىم. يكونانى كوزىم شالدى. ىشتەي حريستيان رۋحاني الەمىنىڭ ۇلكەن قۇندىلىعىنىڭ ساقتالعانىنا تاڭقالدىم. سوناۋ كونستانتينوپول داۋىرىندەگى قۇندىلىق ءالى كۇنگە شەيىن مۇرتى بۇزىلماپتى.
بۇل دا بولسا جاھانعا ورتاق جاۋھار - اييا سوفيانى بارشا قادىرلەيدى دەگەن ءسوز. ءسويتىپ، الماتىعا ورالدىق. قازاقتىڭ «مىڭ رەت ەستىگەننەن، ءبىر رەت كورگەن ارتىق» دەگەن اتالى پايىمىنىڭ راستىعىنا تاعى دا كوز جەتكىزىپ قايتتىق.
ولجاس مۇراتبەك ۇلى