الماتى مەملەكەتتىك قۋىرشاق تەاترى العىس ايتۋ كۇنىنە وراي كىشكەنتاي بۇلدىرشىندەر مەن ولاردىڭ اتا-انالارىنا رۋحاني دەمالىس، شاتتىققا تولى كوڭىل-كۇي، تاڭعاجايىپ سيقىرلى ساپار سىيلادى. تەاتر رەپەرتۋارىنداعى ۇزدىك قويىلىمداردىڭ ءبىرى دە بىرەگەيى – «قۋىرشاق دۋمان» قويىلىمىن قايىرىمدىلىق ماقساتتا ۇسىندى.
شىنايى دا تۇنىق بولمىسىمەن پەرىشتە جۇرەكتى كىشكەنتاي كورەرمەندەردى ەرتەگىلەردىڭ تۇڭعيىق الەمىنە جەتەلەيتىن قۋىرشاق تەاترىنىڭ ۇجىمى جىل سايىن تەاتر تورىنە الەۋمەتتىك جاعدايى تومەن، مۇمكىندىگى شەكتەۋلى، از قامتىلعان وتباسىلارعا ارناپ قايىرىمدىلىق قويىلىمدار كورسەتۋدى يگى داستۇرگە اينالدىرۋدا. بيىلعى جىلى دا تەاتر ساحناسىندا وتىز سەگىز جىل بويى ۇزدىكسىز كورسەتىلىپ كەلە جاتقان الپىسقا جۋىق قۋىرشاق ءتۇرى ونەر كورسەتەتىن «قۋىرشاق دۋمان» قويىلىمى ءوز كورەرمەندەرىن اسىعا كۇتەدى.
سۇيىكتى بۇلدىرشىندەرىنە ءۇزىلىسسىز قىزمەت جاسايتىن ونەر ورداسىنىڭ رەپەرتۋار قورجىنىنداعى ۇزدىك قويىلىمداردى بالالاردىڭ دەمالىس ۋاقىتىن دۇرىس باعىتتا ۇيىمداستىرۋ ماقساتىندا رەپەرتۋار كوكجيەگى تاربيەلىك، ادامگەرشىلىك، ەستەتيكالىق قۇندىلىقتار مەن اسا باي مادەنيەتىمىز بەن اسىل مۇرامىزدى دارىپتەيدى.
«وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىعى – بۇل ءبىزدىڭ جالپىۇلتتىق مىندەتىمىز»، – دەپ اتاپ وتكەن مەملەكەت باسشىسى قاسىم-جومارت توقايەۆتىڭ جارلىعىمەن جاريالانعان بالالار جىلى اياسىندا تەاتر ۇجىمى قالامىزداعى جالپى ءبىلىم بەرەتىن مەكتەپ وقۋشىلارى مەن مەكتەپكە دەيىنگى ۇيىم تاربيەلەنۋشىلەرىنە ارناپ تاربيەلىك جانە تانىمدىق ماعىناسى زور دوستىق پەن كوپشىلدىككە ۇندەيتىن «ۇيشىك»، مۋزىكالىق ساۋاتتىلىققا شاقىراتىن «قاسقىر مەن جەتى لاق»، قورقىنىشتى جەڭۋگە ۇيرەتەتىن «ارىستاننىڭ ۇرەيىن قالاي ەمدەيمىز؟» سىندى قويىلىمداردى ۇسىنىپ كەلەدى.
سونىمەن قاتار، بالالاردى مادەنيەتكە شاقىرۋ، قۋىرشاق ونەرىمەن تانىستىرۋ جانە تەاتر مادەنيەتىن قالىپتاستىرۋ ماقساتىندا جالپى ءبىلىم بەرەتىن مەكتەپ وقۋشىلارىنا تەاتر ارتىستەرىمەن قاتىسۋىمەن «قۋىرشاقتار قۇپياسى» اتتى شەبەرلىك ساعاتتارىن وتكىزۋدە.
قۋىرشاق تەاترىنىڭ قازىنالى قويىلىمدارىنان قاپى قالماڭىزدار دەيمىز. كوكتەم شاتتىققا تولى بولسىن!