قارۋلى كۇشتەر اباي وبلىسىنداعى ءورتتى سوندىرۋگە جۇمىلدىرىلدى

29 بىرلىك اسكەري اۆتوكولىك جانە ينجەنەرلىك تەحنيكا تارتىلدى

توتەنشە جاعدايلار مينيسترلىگىنىڭ مالىمەتىنشە، رەسەيدىڭ التاي ولكەسىندە قۋراعان ءشوپتىڭ تۇتانۋىنان باستالعان ءورت اباي وبلىسىنداعى «سەمەي ورمانى» تابيعي رەزەرۆاتىنا تاراعان. ءورتتىڭ جالپى اۋدانى 1500 گا قۇرادى، دەپ حابارلايدى Almaty-akshamy.kz. 

قورعانىس ءمينيسترى، گەنەرال-پولكوۆنيك رۋسلان جاقسىلىقوۆتىڭ نۇسقاۋى بويىنشا ورتكە قارسى شارالاردى ورىنداۋعا ارنايى دايىندىعى بار «شىعىس» وڭىرلىك قولباسشىلىعىنىڭ كەلىسىمشارت بويىنشا جۇزدەن اسا وفيسەرى مەن اسكەري قىزمەتشىسى جۇمىلدى.

سونىمەن قوسا 29 بىرلىك اسكەري اۆتوكولىك جانە ينجەنەرلىك تەحنيكا (امبەباپ جول ماشينالارى جانە باسقا دا ءورت سوندىرەتىن قۇرالدار) تارتىلدى.

اۋداندى بارلاۋ، سونداي-اق ءورتتى تىكەلەي ءسوندىرۋ ارنايى اسپامەن 3،5 توننا سۋ تاسيتىن «بەمبي» قۇرىلعىسىمەن جابدىقتالعان مي-17 كولىكتىك-جاۋىنگەرلىك تىكۇشاعى ارقىلى جۇزەگە اسىرىلۋدا.

جەكە قۇرام ورمان ءورتىنىڭ ەكى وشاعىن سوندىرۋمەن اينالىسۋدا.

بىرىنشىسىندە، وقشاۋلانعان ۋچاسكەدە جۇمىس جۇرگىزىلۋدە، ەكىنشىسىندە، قاشىقتاعى جەردە قورعانىس جەلىسى قۇرىلۋدا.

اسكەري قىزمەتشىلەر ارنايى تەحنيكامەن اعاشتاردى قۇلاتىپ، ۇيىندىلەر سالۋ ۇستىندە.

ءورت ءسوندىرۋ جۇمىستارى «شىعىس» وڭىرلىك قولباسشىلىعىنىڭ تىلدىق قامتاماسىز ەتۋ باسقارماسى شتابىنىڭ باستىعى، پولكوۆنيك ەرجان ەسەنبايەۆتىڭ باسشىلىعىمەن جۇرگىزىلىپ جاتىر.

قارۋلى كۇشتەردىڭ بولىمشەلەرى جەدەل شتابپەن ۇدايى بايلانىستا.