Freedom Ticketon Awards پرەمياسىنىڭ جەڭىمپازدارى بەلگىلى بولدى

قازاقستانداعى سەگىزىنشى ۇلتتىق Freedom Ticketon Awards پرەمياسىنىڭ جەڭىمپازدارى بەلگىلى بولدى. بيىل پرەميا جاڭا فورماتتا ۇسىنىلدى: داۋىس بەرۋ ءتارتىبى مەن ماراپاتتاۋ ءراسىمى دە وزگەرىسكە ۇشىرادى، دەپ حابارلايدى aqshamnews.kz

پرەميانىڭ اياسىندا بارلىعى 6 كاتەگوريا، 27 نوميناسيا بويىنشا جەڭىمپازدار انىقتالدى: «كينو»، «كونسەرت»، «تەاتر»، «ART»، «بالالارعا ارنالعان قويىلىمدار»، «عىلىم مەن ماڭىزدىلىق».

Freedom Ticketon Awards 2025 جەڭىمپازدارىن انىقتاۋ جاڭا سحەما بويىنشا جۇرگىزىلدى. ۇمىتكەرلەرگە داۋىس بەرۋ ءۇش كەزەڭگە ءبولىندى:

-حالىقتىق داۋىس بەرۋ 3 ناۋرىز بەن 16 ءساۋىر ارالىعىندا https://award.ticketon.kz/  سايتىندا ءوتتى. بارلىق قالاۋشىلار مادەنيەت پەن ونەر سالاسىنداعى سۇيىكتى تۇلعالارىنا داۋىس بەرە الدى. بارلىعى 142 875 داۋىس بەرىلدى.

-نومينانتتاردىڭ داۋىس بەرۋى. بيىل العاش رەت پرەميا نومينانتتارى ارنايى پروموكودتاردى پايدالانا وتىرىپ، ءوز نوميناسيالارىندا داۋىس بەرە الدى. الايدا، وزدەرىنە داۋىس بەرۋگە رۇقسات ەتىلمەدى؛

-ۇيىمداستىرۋ كوميتەتىنىڭ داۋىس بەرۋى دە پروموكودتار ارقىلى جۇزەگە استى. بيىلعى Ticketon Awards ۇيىمداستىرۋ كوميتەتىنىڭ قۇرامىنا ونەر سالاسىنىڭ تانىمال وكىلدەرى كىردى: كينورەجيسسەر راشيد نۋگمانوۆ، پروديۋسەر جانە اندەردىڭ اۆتورى ەۆا بەحەر، دراماتۋرگ ولگا مالىشيەۆا، مەديا-پروديۋسەر ازامات ءاشىموۆ، كينوسىنشى ولەگ بورەسكيي، تەلەجۇرگىزۋشى ادەل سميت، سونداي-اق Freedom Ticketon كومپانياسىنىڭ ماركەتينگ ديرەكتورى، پرەميانىڭ جوبا مەنەدجەرى اننا ۆورونينا. ۇيىمداستىرۋ كوميتەتىنىڭ ءتورايىمى – Freedom Ticketon كومپانياسىنىڭ باس ديرەكتورى ۆيكتوريا تورگۋناكوۆا بولدى.

حالىقتىق داۋىس بەرۋ ناتيجەسى بويىنشا كوشباسشى 50 ۇپاي الدى، ال قالعان نومينانتتار ءوز داۋىستارىنىڭ سانىنا قاراي كوشباسشىمەن سالىستىرمالى تۇردە ۇپاي جينادى. ۇيىمداستىرۋ كوميتەتى مۇشەسىنىڭ ءاربىر داۋىسى 15 بالل رەتىندە ەسەپتەلسە، ال نومينانتتىڭ باسقا قاتىسۋشىعا بەرگەن ءاربىر داۋىسى 5 بالل بولىپ قوسىلدى. داۋىس بەرۋ ناتيجەلەرىن پرەميانىڭ تاۋەلسىز اۋديتورلىق توبى ەسەپتەدى. ولار قۇپيالىلىق تۋرالى كەلىسىمگە (NDA) قول قويىپ، 28 مامىردا وتكەن «Ticketon Awards» ماراپاتتاۋ راسىمىنە دەيىن داۋىس بەرۋ ناتيجەلەرىن قۇپيا ۇستادى.

بارلىق جەڭىمپازدارعا Freedom Ticketon پلاتفورماسىندا جارنامالىق ىلگەرىلەتۋگە ارنالعان سەرتيفيكاتتار جانە بىرنەشە ميلليون تەڭگەگە دەيىنگى اقشالاي سىيلىقتار تابىستالدى. جالپى جۇلدە قورى – 58 ميلليون تەڭگەنى قۇرادى! كوپتەگەن جەڭىمپازداردىڭ ايتۋىنشا، بۇل ماراپات ولاردىڭ جوبالارىن جاڭا دامۋ دەڭگەيىنە شىعارۋعا، پروموۋشنمەن قامتاماسىز ەتۋگە جانە قازاقستاندىق مادەنيەتتىڭ جاڭا جوبالارى تۋرالى كەڭ اۋديتورياعا اقپارات تاراتۋعا زور مۇمكىندىك بەرەدى.

بيىل سالتاناتتى ءراسىم پرەميا ءۇشىن ادەتتەن تىس سيفرلىق فورماتتا ءوتتى. ۇيىمداستىرۋ كوميتەتى مەن ارنايى شاقىرىلعان جۇلدىزدى قوناقتار ق ر ءا.قاستەيەۆ اتىنداعى مەملەكەتتىك ونەر مۋزەيىنىڭ ءبىر زالىندا باس قوستى. راسىمگە قاتىسقىسى كەلگەن كورەرمەندەردىڭ بارلىعى ونلاين تاماشالادى.

جەڭىمپازداردىڭ ەسىمدەرى جازىلعان كونۆەرتتەردى قازاقستاندىق ونەر مەن مادەنيەت سالاسىنىڭ تانىمال وكىلدەرى اشتى: «مونتە-كارلونىڭ ءبىرىنشى سكريپكاسى – 2004» اتاعىنىڭ يەگەرى دجاميليا سەركەبايەۆا، REPAS كومانداسىنىڭ گراففيتي-سۋرەتشىسى نيكيتا Biggie، ER10 Media جوباسىنىڭ نەگىزىن قالاۋشى جانە CEO ەلنورا روزمۋحامەدوۆا، قازاقستاننىڭ ەڭبەك سىڭىرگەن قايراتكەرى، كسرو كينەماتوگرافيستەر وداعىنىڭ مۇشەسى جان بايجانبايەۆ، اكتەر جانە شوۋمەن قاجەت سماعۇل، تانىمال ءانشى، قازاقستاننىڭ ەڭبەك سىڭىرگەن قايراتكەرى جاننا ورىنباساروۆا، ق ر ەڭبەك سىڭىرگەن ءارتىسى ايجان نۇرماعامبەتوۆا، سونداي-اق پرەميانىڭ ۇيىمداستىرۋ كوميتەتىنىڭ مۇشەلەرى. 

جەڭىمپازداردىڭ ەسىمدەرى سالتاناتتى راسىمگە دەيىن قۇپيا ساقتالدى. لاۋرەاتتار جاريالانعاننان كەيىن جۇرگىزۋشىلەر گۋلباحور حاسانوۆا مەن اسەت سەرعازى ولارعا تىكەلەي ەفيردە قوڭىراۋ شالىپ، قۇتتىقتادى. كەيبىر جەڭىمپازدار كۇتپەگەن قوڭىراۋعا تاڭعالىپ، ابدىراپ قالدى.

ازەربايجان مامبەتوۆ اتىنداعى مەملەكەتتىك دراما جانە كومەديا تەاترىنىڭ ارتىستەرى “جىل سپەكتاكلى” (مەملەكەتتىك تەاترلار اراسىنداعى) نوميناسياسىنداعى جەڭىسى تۋرالى ەستىگەن ساتتە تولقىنىستارىن جاسىرا الماي، جارقىن داۋىستارىمەن ەفيردى جانداندىرىپ جىبەردى. ال “قازاقستاندىق جىلدىڭ كونسەرتى” نوميناسياسىنىڭ جەڭىمپازى ديماش قۇدايبەرگەنمەن تىكەلەي بايلانىس ورناتۋ مۇمكىن بولماعانىمەن، ەفيرگە اكەسى، اقىن قانات ايتبايەۆ شىقتى. كورەرمەندەر ونىڭ ۇلىنا دەگەن شىنايى قۋانىشى مەن ماقتانىشىن كوزبەن كورىپ، جۇرەكپەن سەزىندى.

TARSI SYMPHONY ORCHESTRA ۇجىمى اتىنان ەرلان بەيسەمبايەۆ العان اسەرىمەن ءبولىستى: «سوڭىنا دەيىن كىم جەڭەتىنىن بىلمەدىك، شىن مانىندە بىزگە قوڭىراۋ شالادى دەپ تە ويلاعان جوقپىز. سول ساتتە دايىندىق ۇستىندە ەدىك، كەنەت قوڭىراۋ كەلىپ ءتۇستى. بارلىعىمىز ابدىراپ قالدىق، مەنىڭ بويىمدا ەرەكشە تولقۋ بولدى. ءبىزدىڭ ۇجىمنىڭ تىكەلەي ەفيرگە شىققانى – ۇلكەن مارتەبە. وسىنداي ساتتەردە ۇيقىسىز تۇندەر مەن تىنىمسىز ەڭبەكتىڭ ەش كەتپەگەنىن تۇسىنەسىڭ. بۇل – بۇكىل توبىمىزدىڭ بىرلەسكەن ەڭبەگىنىڭ جەمىسى!»

مۇنداي اسەرلى ساتتەر سالتاناتتى راسىمگە ەرەكشە شىنايىلىق پەن جىلىلىق بەرىپ، كورەرمەن مەن قاتىسۋشىلاردىڭ اراسىندا تىكەلەي بايلانىستى سەزىنۋگە مۇمكىندىك سىيلادى. سونىمەن قاتار، ونلاين-فورمات پرەميا جەڭىمپازدارىن قازاقستاننىڭ تۇكپىر-تۇكپىرىنەن جيناۋعا جول اشتى. مۇنداي اۋقىمدى قامتۋ ءداستۇرلى وفلاين شارادا وڭاي جۇزەگە اسار ما ەدى – بەلگىسىز. ال ونلاين-ەفير ارقىلى ورال پەن اقتوبەدەن باستاپ، تۇركىستان مەن جاركەنتكە دەيىنگى كورەرمەندەر جەڭىمپازدارمەن بىرگە قۋانىشقا ورتاقتاسا الدى.

«جىلدىڭ وتاندىق ءفيلمى» نوميناسياسىندا كورەرمەندەردىڭ ىستىق ىقىلاسىنا بولەنگەن قازاقستان مەن قىرعىزستان بىرلەسكەن دراماسى «پريگوۆور» جەڭىمپاز اتاندى. «جىلدىڭ كينواكتەرى» اتاعى كومەديالىق «برات يلي براك» تريلوگياسىنداعى ەستە قالارلىق ءرولى ءۇشىن اكتەر داۋرەن سەرعازينگە بۇيىردى. بيىل العاش رەت ەنگىزىلگەن «جىلدىڭ ART-وبەكتىسى» نوميناسياسىندا جەڭىسكە «ۆيكتور سويعا ارنالعان ارت-وبەكت» ينستاللياسياسى جەتتى. بۇل جۇمىس «يگلا» ءفيلمىنىڭ رەجيسسەرى راشيد نۋگمانوۆتىڭ قاتىسۋىمەن اشىلعان بولاتىن. جەكە تەاترلار باعىتى بويىنشا جىلدىڭ سپەكتاكلى دەپ رازيا حاسانوۆانىڭ Interius تەاترى قويعان سەزىمگە تولى ءارى تانىمال «كوڭىلدەس ايەل» سپەكتاكلى تانىلدى.

جەڭىمپازداردىڭ تولىق تىزىمىمەن Freedom Ticketon كومپانياسىنىڭ @ticketonkz Instagram پاراقشاسىندا تانىسۋعا بولادى.

پرەميانىڭ جابىلۋ راسىمىندە Freedom Ticketon كومپانياسىنىڭ باس ديرەكتورى ۆيكتوريا تورگۋناكوۆا الماتى قالاسىنا ەرەكشە سىي جاسالاتىنىن حابارلادى — قالا اكىمدىگى جانە Repas ارت-كومانداسىنىڭ قاتىسۋىمەن مۋرال سالىنادى.

«ءبىز العاشقى مۋرالىمىزدى قازاقستان كينەماتوگرافياسىنىڭ ناعىز ورتالىعىنا اينالعان الماتى قالاسىنا ارناعىمىز كەلەدى. ءوز زامانىندا بۇل قالا كوپتەگەن تانىمال اكتەرلەر مەن رەجيسسەرلەردى قۇشاق جايا قارسى الىپ، ولار وسى جەردە ۇلى كينونى جاساۋعا كىرىسكەن. بۇل ءسات وتاندىق كينو ءوندىرىسىنىڭ دامۋىنا سەرپىن بەردى. سوندىقتان ءبىزدىڭ العاشقى مۋرالىمىز ءدال وسى – كينەماتوگرافيا ءومىر سۇرەتىن قالا الماتىدا پايدا بولادى»، – دەدى ول.

كەش بارىسىندا پروديۋسەر، Ticketon Awards پرەمياسىنىڭ جۇرگىزۋشىسى گۋلباحور حاسانوۆا ءوز اسەرىمەن ءبولىستى: «بۇگىنگى كەش Freedom Ticketon-نىڭ اۋقىمىن، كۇشىن جانە قازاقستان كرەاتيۆ يندۋسترياسىنىڭ دارىندىلىعىن كورسەتتى. بۇل پرەميا – جاي عانا ماراپات ەمەس، ونەرگە جانىن سالعان جاندارعا دەگەن قۇرمەت. بارلىق نومينانتتار مەن جەڭىمپازداردى شىن جۇرەكتەن قۇتتىقتايمىن! حالىقتىڭ سۇيىسپەنشىلىگى مەن شىنايى العىسىنا يە بولا بەرىڭىزدەر!»

پرەميا ۇيىمداستىرۋ كوميتەتىنىڭ ءتورايىمى ۆيكتوريا تورگۋناكوۆا كومپانيانىڭ باستى ميسسياسى تۋرالى ايتا كەتتى:

: «ءبىزدىڭ ماقساتىمىز – كورەرمەن مەن ونەر الەمىنىڭ اراسىنداعى كوپىر بولۋ. ءبىز دامىپ كەلەمىز، جاڭا تەحنولوگيالاردى ەنگىزىپ جاتىرمىز – بۇل دۇرىس باعىتتا كەلە جاتقانىمىزدىڭ بەلگىسى. ءار نارسە بىردەن بولا قويمايدى، ءبىراق ءاربىر سىناق ءبىزدى جەتىلدىرە تۇسەدى، تيىمدىرەك بولۋعا يتەرمەلەيدى جانە وتاندىق كورەرمەنگە مادەنيەت پەن ونەر الەمىنە جاقىنداۋدىڭ جاڭا مۇمكىندىكتەرىن اشادى»، – دەدى ول