دارىگەر – بالالاردىڭ جاناشىرى

№11 قالالىق ەمحانادا اشىق ەسىك كۇنى ءوتتى

1 ماۋسىم – حالىقارالىق بالالاردى قورعاۋ كۇنى قارساڭىندا جانە رەسپۋبليكالىق “دارىگەر – بالالاردىڭ جاناشىرى” اكسياسى اياسىندا №11 قالالىق ەمحانادا س.د. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ پروفەسسورلىق-وقىتۋشىلىق قۇرامىنىڭ قاتىسۋىمەن اشىق ەسىك كۇنى ۇيىمداستىرىلدى، دەپ حابارلايدى aqshamnews.kz

ءىس-شارانىڭ ماقساتى – بالالارعا كەڭەستىك-دياگنوستيكالىق كومەك كورسەتۋ، سونداي-اق اتا-انالارعا بالانىڭ دەنساۋلىعىنا جاۋاپكەرشىلىكپەن قاراۋ، ماماندارعا ۋاقىتىلى جۇگىنۋ قاجەتتىلىگى تۋرالى ءتۇسىندىرۋ جۇمىستارىن جۇرگىزۋ بولدى.

كۇن بويى قازۇمۋ-دىڭ بالالار مەديسيناسى سالاسىنداعى جەتى ءتۇرلى بەيىندى مامانى – پروفەسسورلار، مەديسينا عىلىمدارىنىڭ كانديداتتارى جانە جوعارى ساناتتى دارىگەرلەر – كىشكەنتاي پاسيەنتتەرگە تەكسەرۋ جۇرگىزىپ، كەڭەس بەردى.

اتاپ ايتقاندا، ءىس-شاراعا بالالار ەندوكرينولوگى، كارديوريەۆماتولوگ، اللەرگولوگ-پۋلمونولوگ، ينفەكسيونيست، حيرۋرگ، گاستروەنتەرولوگ جانە پەدياتر قاتىستى.

№11 قالالىق ەمحاناسى مۇنداي ءىس-شارالاردى داستۇرگە اينالدىرعان. مۇندا بالالار اۋرۋىنىڭ الدىن الۋعا، ەرتە دياگنوستيكا جۇرگىزۋگە جانە اتا-انالاردىڭ بالانىڭ دەنساۋلىعىنا سانالى كوزقاراس قالىپتاستىرۋىنا ەرەكشە كوڭىل بولىنەدى.

بالالاردى قورعاۋ كۇنى – بۇل تەك مەرەكە عانا ەمەس، ءاربىر بالانىڭ قۇقىعى مەن ساۋلىعىن ساقتاۋ قاجەتتىگىن ەسكە سالار ماڭىزدى كۇن. بارشا بالا سۇيىسپەنشىلىكتە، ءقاۋىپسىز ورتادا، ەڭ باستىسى – امان-ساۋ ءوسسىن!