Euronews حابارلاۋىنشا، ورتالىق فرانسيادا تابيعي اپات ۇلكەن شىعىن اكەلىپ، حالىقتى جارىقسىز قالدىردى. يتاليادا دا قاۋىپتىلىك دەڭگەيى جوعارى، قىزىل دەڭگەيدەگى ەسكەرتۋ جاريالانعان، دەپ حابارلايدى aqshamnews.kz.
وڭىرلەردى سۋ باسۋ ءقاۋپى ءالى سەيىلمەگەن.
فرانسۋز مەتەورولوگتارىنىڭ ايتۋىنشا، سوڭعى 48 ساعاتتا وڭتۇستىكتەگى اردەش جانە لوزەر دەپارتامەنتتەرىندە 700 ميلليمەترگە دەيىن جاۋىن-شاشىن تۇسكەن. ەكى كۇندىك جاۋىن-شاشىن ورتالىق فرانسيادا سوڭعى 40 جىلداعى ەڭ ءىرى سۋ تاسقىنىنا الىپ كەلدى. قازىرگى ۋاقىتتا تۇرعىن ۇيلەر مەن ينفراقۇرىلىمدى تازالاۋ جۇمىستارى باستالعان.
فرانسيا پرەمەر-مينيسترى ميشەل بارنە كليماتتىڭ وزگەرۋى ادامزاتتى ءتۇرلى تاۋەكەلدەر مەن اپاتتارعا ءجيى ۇشىرايتىنىن اتاپ ءوتتى.
«بۇل داعدارىستاردىڭ بارلىعىن، مىسالى، تەڭىز اپاتتارى، ونەركاسىپتىك اپاتتار، سۋنامي، جەر سىلكىنىستەرى، ءىرى سۋ تاسقىندارى، پاندەميالار جانە تەرروريزم قاۋىپتەرى سياقتى — ءبارىن دە الدىن الا بولجاۋىمىز كەرەك. بۇل ماسەلەلەرگە ەۋروپالىق دەڭگەيدە دايىندالۋ قاجەت»، — دەدى ول.
فرانسيا پرەمەرى FR Alerte دابىل جۇيەسىنە جوعارى باعا بەردى.
يتاليادا دا بۇكىل ەل بويىنشا قىزىل دەڭگەيدەگى ەسكەرتۋ جاريالاندى. قاتتى جاۋعان جاۋىننىڭ ارتى ەلدە لايلى سۋ تاسقىندارىن تۋدىردى. ەڭ كوپ زارداپ شەككەن ايماق — ەميليا-رومانيا. بولون قالاسىندا تاسقىن اۆتوكولىكتى اعىزىپ كەتتى. كولىك ىشىندە بالا بولعان.
توسكاناداعى ەلسا وزەنى مەن سيسيلياداعى سالسو وزەندەرى ارناسىنان كوتەرىلگەن. سوندىقتان جەرگىلىكتى تۇرعىندارعا مۇمكىندىگىنشە ۇيدەن شىقپاۋعا كەڭەس بەرىلگەن.