الماتىدا كولىكتەردى زاڭسىز تىركەۋشىلەردىڭ قىلمىستىق ارەكەتتەرى انىقتالدى.
ىشكى ىستەر مينيسترلىگىنە قاراستى ۇيىمداسقان قىلمىسقا قارسى كۇرەس ءبولىمى پروكۋراتۋرانىڭ قولداۋىمەن قۇجاتتاردى جالعان جاساۋ جانە كولىك قۇرالدارىنىڭ يدەنتيفيكاسيالىق نومىرلەرىن وزگەرتۋگە قاتىستى اۋقىمدى وپەراسيا جۇرگىزگەن، دەپ حابارلايدى aqshamnews.kz.
وپەراسيا بارىسىندا كولىكتەردىڭ VIN-كودتارىن بۇزاتىن قۇپيا سەح تابىلدى. جالپى العاندا، زاڭسىز تىركەۋگە قويىلعان 150-دەن استام كولىك انىقتالدى.
"ارنايى حالىققا قىزمەت كورسەتۋ ورتالىقتارىنىڭ قىزمەتكەرلەرى مەن «دەلدالدار» وسى قىلمىستىق ارەكەتتەرگە قاتىسى بار ەكەنى بەلگىلى بولدى. ءاربىر «دروپپەر» ارقىلى 50-گە دەيىن كولىك راسىمدەلگەن. بارلىعى 17 ادام ۇستالدى. قازىرگى ۋاقىتتا قىلمىستىق ىستەر بويىنشا زاتتاي دالەلدەر تاركىلەنىپ، حالىققا قىزمەت كورسەتۋ ورتالىقتارىنىڭ قاۋىپسىزدىك قىزمەتىمەن بىرگە تەكسەرۋ جالعاسۋدا"، - دەدى ىشكى ىستەر مينيسترلىگىنىڭ ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
الدىن الا بولجام بويىنشا شىعىن 320 ميلليون تەڭگەدەن استام قاراجاتتى قۇرايدى. 17 قىلمىستىق ءىس قوزعالىپ، وعان الاياقتىق، قۇجاتتاردى جالعان جاساۋ جانە ەسەپكە الۋ بازالارىنا جالعان مالىمەت ەنگىزۋ ايىپتارى تاعىلعان.