«باقسى سيقىرى» شىعارماسى ونەر سۇيەر قاۋىمدى ءتانتى ەتتى
«استانا كەشتەرi» حI حالىقارالىق ونەر فەستيۆالىنىڭ العاشقى كونسەرتىندە ەرەكشە مۋزىكالىق تۋىندىنىڭ پرەمەراسى ءوتتى.
فرانسۋز كومپوزيتورى پەر تيللۋا جازعان قوبىز بەن سكريپكاعا ارنالعان «باقسى سيقىرى» اتتى جاڭا مۋزىكالىق شىعارماسى بارشا ونەر سۇيەر قاۋىمدى ءتانتى ەتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
ەكى ىشەكتى اسپاپ – قىلقوبىز بەن سكريپكانىڭ قايتالانباس دۋەتىن تىڭدارماندار جوعارى باعالادى. الەمدىك پرەمەرانى فرانسيادان كەلگەن قوبىزشى ايگەريم ەرساينوۆا-شۋستەر مەن سكريپكاشى كۆەنتين فوگەل ورىندادى.
سونداي-اق بۇل كەشتە بەلگىلى قازاقستاندىق جانە شەتەلدىك ونەر جۇلدىزدارى فرانسۋز كومپوزيتورىنىڭ فورتەپيانولىق جانە انسامبلدىك تۋىندىلارىن شىرقادى. بەلگىلى پيانيست، قازاقستاننىڭ ەڭبەك سىڭىرگەن قايراتكەرى تيمۋر ۋرمانچەيەۆ، الت اسپابىندا ويناعان اننا سەروۆا (يتاليا)، سكريپكاشى شولپان مانكەيەۆا، ۆيولونچەليست مۇرات ناربەكوۆ پەن پيانيست دينا ميرمانوۆانىڭ شەبەرلىگى زور ىقىلاسقا بولەندى. مۋزىكانتتار پەر تيللۋا شىعارمالارىنىڭ اۋەنى مەن كوركەمدىك الۋان تۇرلىلىگى ەرەكشە ەكەندىگىن اتاپ ءوتتى
پەر تيللۋا – 8 ۇلكەن سيمفونيانىڭ، 20 سيمفونيالىق پوەمانىڭ، 3 وركەستر، 3 حور جانە 7 سوليست ءۇشىن جازىلعان وراتوريانىڭ اۆتورى. كوپتەگەن ۇلتتىق جانە حالىقارالىق سىيلىقتاردىڭ يەگەرى بولىپ تابىلادى. كومپوزيتور الەمدى ارالاپ، ورتالىق ازيا مەن ورتالىق شىعىس ەلدەرىنە ءجيى ساياحاتتاعان. بىرنەشە جىل ازەربايجان مەن وزبەكستاندا ءومىر ءسۇرىپ، وسى ەلدەردىڭ مادەنيەتىن تەرەڭ زەرتتەگەنى كومپوزيتوردىڭ مۋزىكاسىندا دا ايقىن كورىنىس تاپقان. قازىرگى كەزدە تيللۋانى الەم مۋزىكانتى دەپ اتايدى. فرانسۋز اۆتورى قازاق مۋزىكاسى نەگىزىندە ۇلتتىق اسپاپتاردا ورىندالاتىن كوپتەگەن كومپوزيسيالاردى جازدى.
اۆتوردىڭ ايتۋىنشا، قوبىزدىڭ ءۇنى وعان ەرەكشە اسەر ەتتى.
«قوبىزدىڭ ءۇنى مەنى بىردەن باۋراپ الدى. ونىڭ قايتالانباس اۋەندەرى «باقسى سيقىرى» اتتى قوبىز بەن سكريپكاعا ارنالعان شىعارمانىڭ جازىلۋىنا شابىت بەردى. بۇل – مەنىڭ قازاقستان ەلىنە دەگەن قۇرمەتىمدى بىلدىرەتىن ارنايى تارتۋىم. قازاقستانعا العاش رەت كەلىپ، وسى كەرەمەت ەلدىڭ استاناسىندا شىعارماشىلىق كەشىمدى وتكىزۋ – مەن ءۇشىن ۇلكەن مارتەبە»، - دەپ جەتكىزدى پەر تيللۋا.
ول فەستيۆالدىڭ ۇيىمداستىرۋشىسى – «دەگدار» گۋمانيتارلىق قورىنا ءوز العىسىن ءبىلدىردى. فرانسۋز كومپوزيتورىنىڭ مۋزىكاسى ونەردە شەكارا بولمايتىنىن تاعى ءبىر دالەلدەي ءتۇستى. بۇل تۋرالى ءوز پىكىرىن «دەگدار» قورىنىڭ ديرەكتورى لاۋرا احمەتوۆا جەتكىزدى.
پەر تيللۋانىڭ شىعارماشىلىعى كوپ قىرلى. ونىڭ فرانسيا تورىندە تۋعان اۋەندەرىندە ازيا ءۇنى ەستىلەدى. كومپوزيتور قازاق مۋزىكاسىن وتە جاقىن قابىلدادى. جالپى، جىل سايىن فەستيۆال اياسىندا سان ءتۇرلى مەملەكەتتىڭ مۋزىكالىق ونەرىن ءوزارا جاقىنداستىراتىن ەرەكشە كونسەرتتەر وتەدى. دەمەك، مۋزىكا ونەرى اينالامىزدى جارقىن ەتىپ، بىرلىگىمىزدى ارتتىرا تۇسەتىن الىپ كۇشكە يە، - دەدى لاۋرا احمەتوۆا.
«استانا كەشتەرى» ونەر فەستيۆالىنىڭ تاعى 3 كونسەرتى «استانا بالەت» تەاترىندا وتەدى جانە كورەرمەندەر ولاردى تەگىن تاماشالاي الادى.