فينلياندياداعى "ياحتياري" زووباعىندا ءومىر ءسۇرىپ جاتقان ەكى الىپ پاندا قىتايعا قايتارىلادى.
پاندالار 2018 جىلدان بەرى وسى زووباقتا تۇرىپ كەلەدى، ولاردى جۇڭگو حالىق رەسپۋبليكاسىنىڭ ءتوراعاسى سي ءسزينپيننىڭ فينلياندياعا ساپارى كەزىندە 15 جىلعا جالعا الۋ كەلىسىمى بويىنشا اكەلگەن بولاتىن. الايدا سوڭعى جىلدارى زووباق قارجىلىق قيىندىقتارعا تاپ بولدى، دەپ جازادى فيندىك "Yle" باسىلىمى، دەپ حابارلايدى aqshamnews.kz.
"ياحتياري" زووباعىنىڭ باسقارما ءتوراعاسى ريستو سيۆونەن بۇل شەشىمگە بىرنەشە فاكتورلاردىڭ اسەر ەتكەنىن ايتتى. ولاردىڭ ىشىندە:
كوروناۆيرۋس پاندەمياسى؛
تۋريستەر سانىنىڭ ازايۋى؛
ۋكرايناداعى جاعدايعا بايلانىستى ينفلياسيا جانە پايىزدىق مولشەرلەمەلەردىڭ ءوسۋى.
وسى قيىندىقتاردى ەسكەرە وتىرىپ، زووباق قارىزدارىن قايتا قۇرىلىمداۋ تۋرالى ءوتىنىش بەرۋدى جوسپارلاپ وتىر.
لۋمي مەن پيۋريۋ ەسىمدى پاندالار كۇزدىڭ سوڭىنا دەيىن زووباقتا بولماق. كەيىن ولاردى حالىقارالىق نۇسقاۋلىقتارعا سايكەس كارانتينگە ورنالاستىرادى، بۇل ولاردى قىتايعا قايتارۋ الدىنداعى دايىندىقتىڭ ءبىر بولىگى بولىپ تابىلادى.