وتشاشۋدى جاعۋ كەزىندە جارىلىس بولعان
رەسەيدىڭ ريازان وبلىسىنىڭ زاحاروۆسكيي اۋدانىندا وتشاشۋ كەزىندە قازا تاپقان ەر ادام ماسكەۋدىڭ شىعىس اكىمشىلىك وكرۋگى بويىنشا ىشكى ىستەر باسقارماسىنىڭ ەكونوميكالىق قاۋىپسىزدىك جانە سىبايلاس جەمقورلىققا قارسى ءىس-قيمىل ءبولىمىنىڭ قىزمەتكەرى بولىپ شىقتى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
تاسس-تىڭ مالىمەتىنشە، ول جاڭا جىل تۇنىندە وتباسىمەن فەيەرۆەرك اتقان. وتشاشۋدى جاعۋ كەزىندە جارىلىس بولىپ، سونىڭ سالدارىنان پوليسيا قىزمەتكەرى باس سۇيەگىنەن جاراقات الىپ، سول جەردە قايتىس بولدى. ول ىشكى ىستەر ورگاندارىندا 2003 جىلدان بەرى جۇمىس ىستەگەن.
بۇعان دەيىن رەسەي فەدەراسياسى ريازان وبلىسى بويىنشا تەرگەۋ باسقارماسىنىڭ باسپا ءسوز قىزمەتى وتشاشۋ كەزىندە جاراقات العان 1984 جىلى تۋعان ەر ادامنىڭ ولىمىنە قاتىستى تەرگەۋگە دەيىنگى تەكسەرۋ جۇرگىزىلىپ جاتقانىن حابارلاعان بولاتىن. تەرگەۋشىلەر وقيعا ورنىن قاراپ، پيروتەحنيكالىق زاتتار مەن قاجەتتى قۇجاتتاردى تاركىلەدى.