بيىل 3 قۇس فابريكاسى ىسكە قوسىلادى
الماتى وبلىسىندا قۇس شارۋاشىلىعىمەن 10 كاسىپورىن اينالىسادى، دەپ حابارلايدى Almaty-akshamy.kz.
كاسىپورىندار جىلىنا 100 مىڭ توننادان استام قۇس ەتى مەن 1 ملرد دانا جۇمىرتقا وندىرەدى. بۇل دەگەنىمىزى رەسپۋبليكاداعى بارلىق قۇس ەتىنىڭ – 36%-ىن، جۇمىرتقانىڭ -20%-ىن قۇرايدى دەگەن ءسوز.
قۇس ونىمدەرى وبلىستىڭ جانە الماتى قالاسىنىڭ ىشكى نارىعىن تولىق قامتۋعا جەتكىلىكتى، باسقا وڭىرلەر مەن ەكسپورتقا 25 مىڭ توننا قۇس ەتى شىعارىلادى.
قۇس شارۋاشىلىعىن ودان ءارى دامىتۋدى جىلدىق قۋاتتىلىعى 173 مىڭ توننا ەت شىعارۋعا ارنالعان 3 قۇس فابريكاسىن ىسكە قوسۋمەن بايلانىستىرۋعا بولادى، وعان 200 ملرد تەڭگەدەن استام ينۆەستيسيا سالىندى. اتاپ ايتقاندا، ۇيعىر اۋدانىندا «پريما قۇس» ج ش س 36 مىڭ تونناعا، كەربۇلاق اۋدانىندا – «كاۋسار اگرو» ج ش س - 17 مىڭ تونناعا جانە ىلە اۋدانىندا – «ايتاس» كومپانياسىمەن 120 مىڭ توننا ءونىم وندىرەتىن فەرما ىسكە قوسىلادى دەپ جوسپارلانعان.
ايتا كەتەيىك، قايتا وڭدەۋ سالاسىندا سوڭعى بەس جىلدا 65 جاڭا نىسان ىسكە قوسىلىپ، 28 ءوندىرىس جاڭعىرتىلدى، بۇل تاماق ونىمدەرى ءوندىرىسىنىڭ 1،7 ەسە ءوسۋىن قامتاماسىز ەتتى.
وبلىستىڭ ىشكى نارىعىندا وتاندىق ازىق – تۇلىك تاۋارلارىنىڭ ۇلەسى 85% - دى، يمپورتتىق ونىمدەر -15% - دى قۇرايدى. بۇگىندە اۋىل شارۋاشىلىعى شيكىزاتىن وڭدەۋ ۇلەسى 60% – عا دەيىن، كاسىپورىندار قۋاتتىلىعىنىڭ جۇكتەلۋ دەڭگەيى – 72% - عا دەيىن ارتتى.
قازىرگى ۋاقىتتا اگروونەركاسىپتىك كەشەندى دامىتۋدىڭ 2021-2025 جىلدارعا ارنالعان ۇلتتىق جوباسى ماقۇلداندى، بۇل رەتتە بولاشاقتا الماتى وبلىسىنىڭ اگرارلىق سەكتورىن دامىتۋعا تىڭ سەرپىن بەرەتىن جالپى قۇنى 355 ملرد تەڭگەنى قۇرايتىن 85 ينۆەستيسيالىق جوبا ىسكە اسىرۋ كوزدەلۋدە.