قىزدىڭ قۇپيا ءولىمى
ماسكەۋدىڭ نيكۋلين سوتى توميريس بايسافانى ءولتىردى دەپ ايىپتالعان ءمۇرتازالى مەدجيدوۆتىڭ ءىسىن قايتا قارايدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
ريا نوۆوستي حابارلاعانداي، سوت وتىرىسى 19 قاڭتارعا جوسپارلانعان.
2021 جىلدىڭ 7 ماۋسىمىندا القابيلەر مەدجيدوۆتى كىنالى ەمەس دەپ تانىدى، ءبىراق ماسكەۋ قالالىق سوتى ونىڭ كۇشىن جويىپ، ءىستى قايتا قاراۋعا جىبەردى.
2018 جىلدىڭ 13 ساۋىرىندە قازاقستاندىق توميريس بايسافا ممشحق-نىڭ ءتورتىنشى قاباتىنىڭ تەرەزەسىنەن قۇلاپ كەتتى. قىز ماسكەۋدەگى ۋنيۆەرسيەتتىڭ حالىقارالىق ەكونوميكالىق قاتىناستار كافەدراسىنىڭ 4-كۋرسىندا وقىپ جۇرگەن. دارىگەرلەر قىزعا بىرنەشە وتا جاسادى، ءبىراق ءۇش اپتادان كەيىن ول اۋرۋحانادا قايتىس بولدى. رەسەيدىڭ تەرگەۋ كوميتەتى «ءوزىن-وزى ءولتىرۋ» بابى بويىنشا تەرگەۋدى باستادى. كەيىنىرەك بۇل ءىس «كىسى ءولتىرۋ» بابى بويىنشا قايتا باعالاندى.
ەكى جىلدان كەيىن 2020 جىلدىڭ 28 شىلدەسىندە بۇل ىسكە قاتىستى ماسكەۋدە داعىستاننىڭ بۇرىنعى پرەمەر-مينيسترىنىڭ ۇلى ءمۇرتازالى مەدجيدوۆ ۇستالدى. تەرگەۋ مالىمەتتەرى بويىنشا، مەدجيدوۆ قىزدى ۇرىپ، تەرەزەدەن يتەرىپ جىبەرگەن.
ءمۇرتازالى مەدجيدوۆ تەرگەۋدىڭ باستاپقى كەزەڭىندە سۇراق-جاۋاپقا الىندى. تراگەديا ورىن العان كۇنى ونى توميريسپەن ءبىر اۋديتوريادا بولعانىن كورگەندەر بار. جىگىت پەن قىزدىڭ ۇرسىسقانى دا ايتىلادى. ءبىراق وعان قارسى دالەلدەردىڭ بولماۋىنا بايلانىستى «ءوزىن-وزى ءولتىرۋ» بابى بويىنشا قىلمىستىق ءىس قوزعالدى.