مەيمانداردىڭ كوبى «التىن ادام» ەكسپوزيسياسىنا كوپ ايالدايدى
EXPO – 2020 Dubai دۇنيەجۇزىلىك كورمەسى باستالعان ءبىر ايدىڭ ىشىندە قازاقستاننىڭ ۇلتتىق پاۆيلونىن 207 مىڭ ادام تاماشالاپتى. «اقىل-ويدى ۇشتاستىرۋ – بولاشاقتى قالىپتاستىرۋ» دەگەن تاقىرىپپەن ءوتىپ جاتقان جيىنعا الەمنىڭ 190-نان استام مەملەكەتى قاتىسىپ جاتىر، دەپ حابارلايدى Almaty-akshamy.kz
EXPO كورمەسى ءۇش اۋماققا بولىنگەن. «مۇمكىندىكتەر» دەپ اتالاتىن كلاستەردە قازاقستاننىڭ پاۆيلونى ورنالاسقان. ۇلتتىق پاۆيلونمەن قوڭسىلاس بىرىككەن اراب امىرلىكتەرىنىڭ، اقش، جاپونيا، جۇڭگو مەن يتاليا سەكىلدى ءبىراز ەلدىڭ عيماراتتارى جايعاسقان.
ۇلتتىق پاۆيلوننىڭ ءىشى زاماناۋي تەحنولوگيالارمەن تولىق جابدىقتالعان. «Vision Machine» ينستاللياسياسىندا اگروونەركاسىپ، قورشاعان ورتانى قورعاۋ، اەروعارىش ونەركاسىبى سەكىلدى سالالارداعى قازاقستاننىڭ الەۋەتى كورسەتىلەدى. بۇدان بولەك، بۇل جەردە ۇلى دالانىڭ باي تاريحىمەن، مادەنيەتىمەن، داستۇرىمەن ءبىر مەزەتتە تانىسۋعا بولادى. مەيمانداردىڭ كوبى «التىن ادام» ەكسپوزيسياسىنا كوپ ايالدايدى. قازاقستاننىڭ تابيعي رەسۋرستارى دا كوپشىلىك ءۇشىن قىزىق. سيرەك كەزدەسەتىن مينەرالداردىڭ ۇلگىلەرى وسىندا قويىلعان.
«ءبىز قازاقستاننىڭ تاريحىن، مادەنيەتىن، جەر بايلىعى جانە تابيعاتى جونىندە اقپارات بەرەمىز. بۇدان باسقا قازاقستاندا شىققان QazVac ۆاكسيناسىن دا كورسەتىپ جاتىرمىز»، - دەدى قازاقستان پاۆيلونىنىڭ قىزمەتكەرى بيبىگۇل جۇماعۇلوۆا.
ادام مەن جاساندى ينتەلەكتىڭ ۇيلەسىمدىلىگى – مۇنى قازاقستان پاۆيلونىنداعى تۇتاس باعدارلامانىڭ وزەگى دەسەك بولادى. مەيمانداردىڭ كوبى وسى شوۋدى تاماشالاۋ ءۇشىن كەلەدى.
بىرىككەن اراب امىرلىكتەرى 7 ملرد دوللاردان استام قاراجات جۇمساپ ۇيىمداستىرعان كورمەنى 25 ملنعا جۋىق ادام تاماشالايدى دەگەن بولجام بار. ال قازاقستان پاۆيلونىن ءبىر كۇننىڭ ىشىندە 7-8 مىڭ ادام ارالاپ شىعادى. دەمالىس كۇندەرى مۇندا كەلۋشىلەردىڭ سانى بۇدان دا كوپ. الداعى ۋاقىتتا قازاقستان پاۆيلونىندا بىرنەشە ءىس-شارا ۇيىمداستىرىلادى. ەلدىڭ ۇلتتىق كۇنى وتەدى، تاۋەلسىزدىك كۇنىنە، ناۋرىز مەيرامىنا ورايلاستىرىلىپ كونسەرتتەر قويىلادى.