قازاقستان ءۇشىن جۋىردا عانا ەنگىزىلگەن الدىن الا كونسۋلتاسيالار وتكىزۋ ءراسىمى جەتى كۇنگە دەيىن سوزىلۋى مۇمكىن
قازاقستان ازاماتتارى ءۇشىن شەنگەن ۆيزاسىن رەسىمدەۋ تارتىبىندە 2023 جىلعى 1 ناۋرىزدان كەيىن ايتارلىقتاي وزگەرىستەر بولعان جوق. سونداي-اق، ەۋروپالىق وداق ەلىمىزدى «قارا تىزىمگە» ەنگىزگەن جوق. بۇل تۋرالى قازاقستانداعى ەو وكىلدىگىنىڭ رەسمي سايتىندا ايتىلعان، دەپ حابارلايدى Almaty-akshamy.kz.
«ەرەجەگە سايكەس شەنگەن ۆيزاسىن بەرۋ تۋرالى شەشىمدى ەو-عا مۇشە مەملەكەتتىڭ ءتيىستى كونسۋلدىعى 15 كۇن ىشىندە قابىلدايدى. اتالعان ەرەجە قازاقستان ءۇشىن بۇرىنعى تۇرىندە قالادى.
ەرەكشە جانە جەكەلەگەن جاعدايلاردا، ياعني ءوتىنىشتى ەگجەي-تەگجەيلى قاراۋ نەمەسە قوسىمشا قۇجاتتاردى ۇسىنۋ قاجەت بولسا، مەرزىم 45 كۇنگە دەيىن ۇزارتىلۋى مۇمكىن. بۇل ءتارتىپ ءوتىنىش بەرۋشىلەردىڭ ازاماتتىعىنا قاراماستان سول سياقتى تەك ەرەكشە جاعدايلاردا عانا قولدانىلادى.
قازاقستان ءۇشىن جۋىردا عانا ەنگىزىلگەن الدىن الا كونسۋلتاسيالار وتكىزۋ ءراسىمى جەتى كۇنگە دەيىن سوزىلۋى مۇمكىن. كونسۋلتاسيالار ستاندارتتى ءراسىم بويىنشا 15 كۇنگە دەيىن جۇرگىزىلەدى. سوندىقتان ءوتىنىش بەرۋشىلەر ءۇشىن ۆيزا بەرۋدە ايتارلىقتاي كىدىرىس بولمايدى.
الدىن الا كونسۋلتاسيا جۇرگىزۋ ۆيزالىق كودەكسپەن رەتتەلەتىن ستاندارتتى ءراسىم. ول ءبىرقاتار ەلدەرگە قولدانىلادى. شەنگەن ايماعىنا مۇشە مەملەكەتتەر بىر-بىرىمەن كەڭەسۋ ءۇشىن جۇيەلى تۇردە قولداناتىن شەنگەن اقپاراتتىق جۇيەسىندە (شيس) «قارا ءتىزىم» دەگەن ۇعىم جوق. شەنگەن اقپاراتتىق جۇيەسى اياسىندا قازاقستان ءۇشىن الدىن الا كونسۋلتاسيالاردى ەنگىزۋ ەو مەن قازاقستان اراسىنداعى ەكىجاقتى ءارتۇرلى باعىتتار جانە سالالار بويىنشا سەرپىندى دامۋدى جالعاستىراتىن قارىم-قاتىناسقا ەش قاتىسى جوق»، - دەلىنگەن حابارلامادا.
ۆيزا الۋعا ءوتىنىش بەرۋ ءتارتىبى تۋرالى جالپى اقپاراتتى كوشى-قون جانە ىشكى ىستەر جونىندەگى باس ديرەكتوراتتىڭ ۆەب-سايتىنان تابۋعا بولادى.