سونىڭ ارقاسىندا وپەراسيادان كەيىن جارانىڭ بەتى تەز جازىلىپ، ادامدا اۋىرسىنۋ سەزىمى بولمايدى ەكەن
سوزىلمالى گەمورروي مەن ءزار تۇرماۋ زاردابىن جىلدار بويى تارتىپ كەلگەن ناۋقاستار ەندى تەز ساۋىعادى. سەبەبى الماتىلىق دارىگەرلەر وتا جاساۋدا جاڭا تەحنولوگيا قولدانا باستادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇل – قالقامانداعى اۋرۋحانانىڭ حيرۋرگ-پروكتولوگ ماماندارى بۇگىندىككە جاساپ جاتقان 6-وپەراسيا. ادەتتە مۇنداي وتا 1 ساعاتقا سوزىلاتىن. الايدا جاڭا ءادىستىڭ ارقاسىندا 20-30 مينۋتتا اياقتالدى.
دارىگەرلەردىڭ ايتۋىنشا، جاڭا تەحنولوگيانى قولدانا باستاعالى ءبىر كۇندە كوپ ناۋقاستى ەمدەۋگە مۇمكىندىك بار.
«مەندە سوزىلمالى گەمورروي بولاتىن، سوعان وتا جاساتتىم. تالاي جىلدان بەرى اۋىرىپ ءجۇردىم. دارىگەرلەردىڭ ارقاسىندا، ەكىنشىدەن، جاڭا تەحنولوگيالىق ءادىستىڭ ارقاسىندا قينالمادىم، وتا جەڭىل ءوتتى»، – دەدى ناۋقاس ساندۋعاش تەمىروۆا.
دارىگەرلەر ماقتاعان، ناۋقاستار جاقتاعان جاڭا قۇرىلعىنى مەديسينا ماماندارى مۇنى سوڭعى ۋاقىتتا ءجيى قولدانىپ ءجۇر. سونىڭ ارقاسىندا وتادان شىققانداردا اۋىرسىنۋ سەزىمى بولمايدى. اۋرۋى اسقىنبايدى جانە ىشەكتىڭ اناتوميالىق قۇرىلىمى تەز ارادا قالپىنا كەلەدى. گەموررويدى ەمدەۋدەگى جاڭا ءادىستىڭ بۇرىنعىدان باستى ايىرماشىلىعى دا – وسى.
«سيركۋليارلى تىگەتىن «لونگو» دەگەن اپپارات بار. شىرىش قابىعىن ويىپ الىپ، سودان سوڭ تىگىلەدى. كولەمى 32-34، ءارتۇرلى بولادى. تاجىريبەمىزبەن سالىستىرعاندا، بۇرىنعى حيرۋرگيالىق تاسىلگە قاراعاندا وسى وتا جەڭىل وتەدى»، – دەدى №7 قالالىق كلينيكالىق اۋرۋحاناسىنىڭ كولوپروكتولوگ دارىگەرى مارات قالەنبايەۆ.
مەديسينا ماماندارىنىڭ ايتۋىنشا، جاڭا تەحنولوگيامەن جاسالعان وتادان كەيىن ناۋقاستار ءبىر جۇمادا قۇلان تازا ايىعادى. الايدا بۇل ءادىستى اۋرۋىن جاسىرىپ، اسقىندىرىپ العاندارعا قولدانا المايدى. سوندىقتان ۋاقىتىلى قارالعان ءجون. الەككە سالاتىن اۋرۋ ۇزاق وتىرۋدان عانا ەمەس، دۇرىس تاماقتانباۋدان دا شىعادى.