ەۋرووداق ءوزارا مالىمەت الماسپاق

نەسيە راسىمدەۋدە وزگەرىس بولۋى مۇمكىن

ەۋرازيالىق ەكونوميكالىق وداق ەلدەرىندە نەسيە راسىمدەۋ قازاقستاندىقتار ءۇشىن ءتيىمدى بولۋى مۇمكىن، دەپ حابارلايدى Almaty-akshamy.kz 24.kz-كە سىلتەمە جاساپ

ويتكەنى ونداعى پروسەنتتىك مولشەرلەمە تومەن. ەكونوميست ماقسات حالىق وسىنداي پىكىردە. دەگەنمەن ساراپشى وداق ەلدەرى جاساعان كەلىسىمنىڭ ءوز قاۋىپ-قاتەرى بار ەكەنىن دە ەسكەرتتى.

وتكەن اپتادا ەاەو ەلدەرى كرەديتتىك تاريح بيۋروسىنان دەرەكتەر الماسۋعا ۋاعدالاستى. ءتىپتى مالىمەتتەرمەن الماسۋ ءتارتىبى بەلگىلەندى.

بۇل ەلدەردىڭ ازاماتتارى مەن كومپانيالارىنا ەۋرازيالىق «بەستىك» اۋماعىندا نەسيە الۋعا مۇمكىندىك بەرەدى. اتالمىش شارا نەگىزىنەن بيزنەس ءۇشىن ءتيىمدى، - دەيدى ماماندار.

كەلىسىمنىڭ ورىندالۋىن رەسەي مەن ارمەنيانىڭ ورتالىق بانكتەرى، بەلارۋس پەن قىرعىزستاننىڭ ۇلتتىق بانكتەرى، قازاقستاننىڭ قارجى نارىعىن رەتتەۋ جانە دامىتۋ اگەنتتىگى قاداعالايدى.

«قازاقستان ازاماتتارىنا رەسەي بانكتەرىندە نەسيە راسىمدەۋ الدەقايدا ءتيىمدى بولۋى مۇمكىن. ويتكەنى وندا پروسەنتتىك مولشەرلەمە تومەن. رەسەيدىڭ ورتالىق بانكى قوياتىن بازالىق مولشەرلەمە دە تومەن. بىلتىر ەلدىڭ ورتالىق بانكى مولشەرلەمەنى 4،25%-كە دەيىن ءتۇسىردى.  ال قازاقستان ءالى 9%-تەن تومەندەتكەن جوق.  سوندىقتان بيزنەس ءۇشىن دە، حالىق ءۇشىن دە رەسەي بانكتەرىنەن  نەسيە راسىمدەۋ ءتيىمدى بولىپ قالادى. اقيقاتى وسى. ءبىراق ءقاۋىپ جاعىن دا ايتىپ ءوتۋ كەرەك. بۇل ءبىزدىڭ قارجىلىق جۇيەگە زيان كەلتىرۋى مۇمكىن»، - دەدى ەكونوميست ماقسات حالىق.