ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا تۇتىنۋشىلاردىڭ قۇقىعىن قورعاۋ ماسەلەسى قارالدى دەپ حابارلايدى almaty-akshamy.kz
وسى باعىتتا اتقارىلىپ جاتقان جۇمىستار تۋرالى ساۋدا جانە ينتەگراسيا ءمينيسترى باقىت سۇلتانوۆ، قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى ولەگ سمولياكوۆ، «اتامەكەن» ۇكپ باسقارما ءتوراعاسى ابىلاي مىرزاحمەتوۆ باياندادى.
تۇتىنۋشىلاردىڭ قۇقىعىن قورعاۋدى قامتاماسىز ەتۋ ماقساتىندا 2020 جىلى زاڭناماعا تۇزەتۋلەر ەنگىزىلدى، ۇكىمەت جانىنان ۆەدومستۆوارالىق كەڭەس قۇرىلدى جانە تۇتىنۋشىلاردىڭ قۇقىعىن بۇزعانى ءۇشىن اكىمشىلىك جاۋاپكەرشىلىك ەنگىزىلدى. 2021 جىلعى 1 قاڭتاردان باستاپ «ءبىر تەرەزە» – e-tutynushy قاعيداتى بويىنشا تۇتىنۋشىلاردىڭ ءوتىنىشىن قابىلداۋدىڭ ءبىرىڭعاي اقپاراتتىق جۇيەسى قولدانىسقا ەنگىزىلدى.
جىل سايىن تۇتىنۋشىلاردىڭ قۇقىعىن قورعاۋ ماسەلەلەرى بويىنشا ازاماتتاردىڭ وتىنىشتەرىنىڭ سانى ارتۋدا. ماسەلەن، ساۋدا جانە ينتەگراسيا مينيسترلىگى 2019 جىلى 6 مىڭعا جۋىق، 2020 جىلى – 20 مىڭنان استام، وسى جىلدىڭ 10 ايىندا – 21 مىڭنان استام ءوتىنىشتى قارادى.
تۇتىنۋشىلاردى تكش، بولشەك ساۋدا، مەديسينالىق، تۋريستىك قىزمەتتەر، بايلانىس جانە كولىك سالالارى الاڭداتادى. «تۇتىنۋشىلاردىڭ قۇقىعىن قورعاۋ تۋرالى» زاڭنىڭ جاڭا رەداكسياسىنىڭ جوباسى قازاقستاندا تۇتىنۋشىلاردىڭ قۇقىعىن قورعاۋ جونىندەگى ومبۋدسمەن ينستيتۋتىن ەنگىزۋدى كوزدەيدى.
«قازاقستاندىقتاردىڭ تۇرمىس ساپاسىن ارتتىرۋ ادال جانە باسەكەگە قابىلەتتى كاسىپكەرلىكتى دامىتۋدىڭ ينديكاتورى بولىپ تابىلاتىن تۇتىنۋشىلاردىڭ قۇقىعىن قورعاۋ دەڭگەيىن ارتتىرۋمەن تىعىز بايلانىستى. ءوز قۇقىقتارىنا سەنىمدى تۇتىنۋشىلار ساپالى تاۋارلارعا، جۇمىستار مەن قىزمەتتەرگە بەلسەندى سۇرانىستى قامتاماسىز ەتەدى. بۇل ەكونوميكانىڭ دامۋىنا ىقپال ەتەدى»، — دەدى ا. مامين.
ينتەرنەت-ساۋدا سالاسىندا تۇتىنۋشىلاردىڭ قۇقىعىنىڭ بۇزىلۋىنا جول بەرمەۋ ماقساتىندا ۇكىمەت باسشىسى ساۋدا جانە ينتەگراسيا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسىپ، وسى جىلدىڭ سوڭىنا دەيىن ەلەكتروندىق ساۋدا سەگمەنتىندە قۇقىقتىق رەتتەۋدى جەتىلدىرۋ بويىنشا ۇسىنىستار ەنگىزۋدى تاپسىردى.
پرەمەر-مينيستر 2022 جىلدىڭ ءبىرىنشى جارتىجىلدىعىندا «ە-tutynushy» جۇيەسىن ازاماتتاردىڭ وتىنىشتەرىن جۇيەلەۋ جانە مەملەكەتتىك ورگاندار تاراپىنان جەدەل ارەكەت ەتۋ ءۇشىن ءبىرقاتار مەملەكەتتىك ورگاننىڭ اقپاراتتىق جۇيەلەرىمەن بىرىكتىرۋدى تاپسىردى.
اقپارات جانە قوعامدىق دامۋ مينيسترلىگىنە ساۋدا مينيسترلىگىمەن، قارجى نارىعىن رەتتەۋ جانە دامىتۋ اگەنتتىگىمەن جانە اكىمدىكتەرمەن بىرلەسىپ، قارجىلىق قىزمەتتەردى تۇتىنۋشىلاردىڭ قۇقىعىن قورعاۋ ماسەلەلەرى بويىنشا حالىقتى اقپاراتتاندىرۋدى كۇشەيتۋ جانە ازاماتتاردىڭ قارجىلىق ساۋاتتىلىعىن ارتتىرۋ تاپسىرىلدى.