كابۋلدا تاعى ءبىر جارىلىس بولدى
ەۋروپانىڭ سىرتقى ءىس-قيمىل قىزمەتى 29 ءساۋىر كۇنى كابۋلداعى مەشىتتە بولعان لاڭكەستىك وقيعاعا بايلانىستى جەكە مالىمدەمە جاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كابۋلدا تاعى ءبىر جارىلىس بولدى. جۇما نامازىنا جينالعان جاماعات زارداپ شەگىپ، كوپ ادام قازا تاپتى. قاسيەتتى رامازان ايىندا بازار، مەكتەپ نەمەسە مەشىتكە جيىلعان بەيبىت تۇرعىندارعا وسىنداي سۇمدىق شابۋىلدار جاسالىپ وتىر»، - دەلىنگەن ەو ديپلوماتيالىق ۆەدومستۆوسىنىڭ مالىمدەمەسىندە.
ەۋروپالىق وداق قازا تاپقانداردىڭ وتباسىلارىنا قايعىرىپ كوڭىل ايتادى. زارداپ شەككەندەردىڭ تەز ساۋىعىپ كەتۋىن تىلەيدى. تەررورعا ەشبىر ءدىني سەنىم-نامىمدا ورىن جوق ەكەنىنە نازار اۋدارادى.
اۋعانستانداعى زورلىق-زومبىلىقتىڭ كۇرت كوبەيۋى اۋعاندىقتارمەن قاتار، حالىقارالىق قاۋىمداستىقتى دا قاتتى الاڭداتىپ وتىر. اۋعانستاننىڭ بارلىق ازاماتتارى، سونىڭ ىشىندە ايەلدەر مەن قىزدار، بالالار، سونداي-اق ەتنيكالىق جانە ءدىني از توپتار وزدەرىنىڭ قۇقىقتارى مەن بوستاندىقتارىن تولىق ساقتاي وتىرىپ، قاۋىپسىزدىكتە ءومىر سۇرۋگە لايىق.
ەو اۋعانستاننىڭ «دە-فاكتو» بيلىگىن بارلىق اۋعان ازاماتتارىنىڭ قاۋىپسىزدىگىن قامتاماسىز ەتۋگە جانە كىنالىلەردى جاۋاپقا تارتۋعا شاقىرادى.
ەۋروپانىڭ سىرتقى ءىس-قيمىل قىزمەتى تەرروريزمگە قارسى ءتيىمدى ساياسات پەن اۋعانستاننىڭ ىشىندە دە، ونىڭ اۋماعىنان شىعاتىن دا لاڭكەستىك ءقاۋپىن جويۋعا باعىتتالعان شارالاردى جۇزەگە اسىرۋ وتە ماڭىزدى ەكەنىن اتاپ ءوتتى.
بۇعان دەيىن حابارلاعانىمىزداي، اۋعانستاننىڭ ءتورت قالاسىندا جارىلىس بولدى.