قازاق ۇلتتىق حورەوگرافيا اكادەمياسى ءوزىنىڭ حالىقارالىق بەدەلىن نىعايتىپ جاتىر.
Euronews ءىرى ەۋروپالىق جاڭالىقتار تەلەارناسى الەمنىڭ 160 ەلىنە تارالاتىن Modern Nomads باعدارلاماسى اياسىندا قازاقستاننىڭ بالەت مەكتەبى تۋرالى ارنايى رەپورتاج ۇسىندى، دەپ حابارلايدى aqshamnews.kz 24.kz-كە سىلتەمە جاساپ.
Modern Nomads – Euronews تەلەارناسىنداعى باعدارلامالاردىڭ جاڭا رەداكسيالىق سەرياسى. باعدارلامادا رەپورتەر قازىرگى زامان مەن ءداستۇردى ۇيلەستىرە وتىرىپ، حالىقارالىق كوزقاراسپەن قازاقستاننىڭ ءتۇرلى مادەنيەت وشاقتارىنا ساياحات جاسايدى. باعدارلاما كورەرمەندى ۇلتتىق ونەرمەن، سانمەن، ساۋلەتپەن، ديزاينمەن جانە ەلدىڭ مادەني دامۋىنىڭ وزگە سالالارىمەن تانىستىرادى.
«قازاق بالەتىنىڭ جاس جۇلدىزدارى استانا ساحناسىن باعىندىرۋدا» اتتى شىعارىلىمدا Euronews تەلەارناسى كلاسسيكالىق ونەردى ۇلتتىق داستۇرلەرمەن ۇيلەستىرەتىن تالانتتى جاس ارتىستەرگە توقتالدى. قازاقستان جاھاندىق بالەت ورتالىقتارىنىڭ بىرىنە اينالىپ كەلەدى.
بۇل رەتتە قازاق ۇلتتىق حورەوگرافيا اكادەمياسى جاڭا تالانتتاردى تاربيەلەۋ مەن دامىتۋدا شەشۋشى ءرول اتقارادى. جاڭا تولقىننىڭ جارقىن وكىلدەرىنىڭ ءبىرى – تورعىن لەبەن. ول جاقىندا بەدەلدى ەۋروپالىق Budapest Ballet Grand Prix-2025 بالەت بايقاۋىندا 1-ورىنعا يە بولدى. ونىڭ ورىنداۋى ۇلتتىق ونەردى جاڭا دەڭگەيگە كوتەرىپ، ءوز ەڭبەگىمەن جاستاردى شابىتتاندىرىپ كەلەدى.
Modern Nomads باعدارلاماسىنداعى قازاقستاندىق بالەت مەكتەبى تۋرالى رەپورتاج ارتىستەردى جوعارى دەڭگەيدە دايارلاپ جاتقانىن كورسەتىپ، ولاردىڭ حالىقارالىق ارەنادا تانىلۋىنا ىقپال ەتەدى. ەندى قازاقستاندىق بالەتتى، اتاپ ايتقاندا، قازاق ۇلتتىق حورەوگرافيا اكادەمياسىن شەت مەملەكەتتەر دە جاقسى تانىپ-بىلەتىن بولادى. بۇل قازاقستاننىڭ حورەوگرافيالىق ءبىلىم بەرۋ جۇيەسىنىڭ جوعارى دەڭگەيدە دامىپ جاتقانىن جانە الەمدىك ارەناعا لايىق ارتىستەر دايارلايتىن مەملەكەت رەتىندەگى بەدەلىن نىعايتادى. اكادەميا جۇڭگو، رەسەي، يتاليا، فرانسيا جانە وزگە دە الەمدىك حورەوگرافيا مەكەمەلەرىمەن ىنتىماقتاستىق ورناتقان.