الماتى قالالىق ازاماتتىق اليانسى تۇراقتى دامۋ ماقساتتارى (تدم) بويىنشا قوعامدىق مونيتورينگ ورتالىعىن ىسكە قوستى.
ورتالىق ۇكىمەتتىك ەمەس ۇيىمدار (ۇەۇ) جوبالارىنىڭ تيىمدىلىگىن تالداۋمەن اينالىسادى. بۇل جونىندە الماتى ازاماتتىق اليانسىنىڭ ءتوراعاسى قايىرجان ءابدىحالىقوۆ وڭىرلىك كوممۋنيكاسيالار قىزمەتىندە (وكق) وتكەن باسپا ءسوز كونفەرەنسياسىندا مالىمدەدى. ۇيىمنىڭ باستى ماقساتى – مەملەكەتتىك قۇرىلىمدار، ۇەۇ مەن ازاماتتار اراسىنداعى ءوزارا ءىس-قيمىلدى دامىتۋ ارقىلى الەۋمەتتىك جانە قوعامدىق ماسەلەلەردى بىرلەسىپ شەشۋگە ىقپال ەتۋ. سونىمەن قاتار، اتالعان اليانس ەكولوگيا، ينكليۋزيۆتى ءبىلىم بەرۋ جانە قوعامدىق باستامالاردى قولداۋ باعىتىندا دا بەلسەندى جۇمىس جۇرگىزۋدە.
اليانس جۇمىسىنا ءارتۇرلى ۇەۇ مەن بەلسەندى ازاماتتار قاتىسادى. قالانىڭ ماڭىزدى ماسەلەلەرىن تالقىلاۋعا تۇرعىنداردى تارتۋ ءۇشىن قوعامدىق تىڭداۋ، «دوڭگەلەك ۇستەل» ۇردىسىندەگى جيىن مەن فورۋمدار ۇيىمداستىرىلادى. بۇرناعى جىلى الماتىدا «تۇراقتى دامۋ ماقساتتارىن جۇزەگە اسىرۋ» تاقىرىبىندا XIII ازاماتتىق فورۋم ءوتتى. وندا ايماقتاعى تۇراقتى دامۋعا قول جەتكىزۋدىڭ ستراتەگياسى مەن جولدارى قاراستىرىلدى.
«كەلەسى فورۋم مامىر-ماۋسىم ايلارىندا وتەدى دەپ جوسپارلانۋدا. ول الماتىداعى ازاماتتىق قوعامنىڭ ينستيتۋسيونالدىق ماسەلەسى مەن دامۋ پەرسپەكتيۆاسىنا ارنالماق. فورۋم قارساڭىندا وزەكتى تاقىرىپتى تالقىلايتىن ءبىرقاتار «دوڭگەلەك ۇستەل» ۇردىسىندەگى جيىن مەن ديالوگتىق كەزدەسۋلەر وتكىزەمىز. بۇل ديالوگ الاڭدارىنا ءوزارا سىندارلى پىكىر الماسۋ مەن شەشىم ىزدەۋگە جاردەمدەسۋ ماقساتىندا قۇرىلعان ۇيلەستىرۋ كەڭەسى مەن الماتى ساراپشىلار كلۋبى بەلسەندى قاتىسادى»، – دەپ اتاپ ءوتتى ق.ءابدىحالىقوۆ.