ماقۇلدانعان قۇجات 2023 جىلعى 2-3 اقپاندا الماتىدا وتەتىن ەۋرازيالىق ۇكىمەتارالىق كەڭەسكە بەكىتۋگە جولدانادى.
25 قاڭتاردا پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين باستاعان مەملەكەتتىك ورگاندار، «اتامەكەن» ۇكپ جانە بيزنەس وكىلدەرىنەن قۇرالعان قازاقستاندىق دەلەگاسيا ماسكەۋدە وتكەن ەۋرازيالىق ەكونوميكالىق كوميسسيا كەڭەسىنىڭ بيىلعى ءبىرىنشى وتىرىسىنا قاتىستى، دەپ حابارلايدى Almaty-akshamy.kz.
ەەك كەڭەسىنە قاتىسۋشىلار 38 ماسەلەنى قارادى، ولاردىڭ ءارقايسىسىن ەگجەي-تەگجەيلى پىسىقتاپ، ءبىرقاتار شەشىم قابىلدادى. بيزنەس ءۇشىن ماڭىزدى ەاەو-عا قاتىسۋشى ەلدەردىڭ ونەركاسىپتىك تاۋاردىڭ 55 تاۋار اتاۋى بويىنشا مەملەكەتتىك ساتىپ الۋلارعا كەدەرگىسىز قول جەتكىزۋ ماسەلەسى شەشىلدى. ول ءۇشىن ەەك كەڭەسى قولدانىستاعى قۇجاتتارعا وزگەرىستەر ەنگىزۋ تۋرالى شەشىم قابىلدادى، ولاردى وندىرىستىك جانە تەحنولوگيالىق وپەراسيالاردىڭ شارتتارىمەن تولىقتىردى. وزگەرىستەر ارنايى ماشينا جاساۋ (ارنايى تەحنيكا)، مۋزىكالىق اسپاپتار مەن جابدىقتار، ەلەكترونيكا جانە راديوەلەكترونيكا سالالارىنا اسەر ەتتى.
ەاەو-نىڭ ورتاق ەلەكتر ەنەرگياسى نارىعىن قالىپتاستىرۋ ماقساتىندا ەلەكتر ەنەرگياسىن بەرۋدىڭ مەملەكەتارالىق قىزمەتتەرىنە قول جەتكىزۋ قاعيدالارى بەكىتىلدى. قاتىسۋشى ەلدەر ەلەكتر ەنەرگياسىن مەملەكەتارالىق تاسىمالداۋ قىزمەتتەرىنە قول جەتكىزۋ قاعيداتتارى، ءتارتىبى، سونىڭ ىشىندە ءتيىستى كەلىسىمدەردى جاساۋ، رەسىمدەۋ، وزگەرتۋ، توقتاتۋ جانە باسقا دا ەرەكشەلىكتەرى بويىنشا ورتاق پىكىرگە كەلدى. قۇجات ورتاق ەلەكتر ەنەرگياسى نارىعىنا قاتىسۋشىلاردىڭ قۋات كوزىن ساتۋ كەزىندە ونى مەملەكەتارالىق تاسىمالداۋعا كەدەرگىسىز قولجەتىمدىلىگىن ايقىندايدى. ماقۇلدانعان قۇجات 2023 جىلعى 2-3 اقپاندا الماتىدا وتەتىن ەۋرازيالىق ۇكىمەتارالىق كەڭەسكە (ەۇاك) بەكىتۋگە جولدانادى.
كەڭەس شەشىمىمەن تۇسقاعازدار ءوندىرىسى ءۇشىن شيكىزات رەتىندە پايدالانىلاتىن پلاستيفيكاسيالانعان پوليۆينيلحلوريدكە ەاەو ءبىرىڭعاي كەدەندىك ءتاريفى يمپورتتىق كەدەندىك باج سالىعىنىڭ نولدىك مولشەرلەمەسى بەكىتىلدى. مولشەرلەمە ەەك كەڭەسىنىڭ شەشىمى كۇشىنە ەنگەن كۇننەن باستاپ جانە 2024 جىلعى 29 اقپانعا دەيىن قولدانىستا بولادى. قازىرگى ۋاقىتتا وسى ماتەريالعا قولدانىلىپ جۇرگەن مولشەرلەمە كەدەندىك قۇننىڭ 6،5% قۇرايدى.
سونداي-اق قاتىسۋشىلار ەاەو-عا قاتىسۋشى ەلدەردىڭ زاڭنامالارىن ۇيلەستىرۋگە، ونىمدەر تىزبەسىنە وزگەرىستەر ەنگىزۋگە، ينتەگراسيالانعان اقپاراتتىق جۇيەنى، كەدەندىك، كولىكتىك راسىمدەردى، اۋىل شارۋاشىلىعىن جانە ت. ب. دامىتۋعا باعىتتالعان تەحنيكالىق رەگلامەنتتەرىنىڭ تالاپتارىن ساقتاۋ ماسەلەلەرىن قارادى.
كەلەسى وتىرىس 2023 جىلعى 17 اقپاندا ماسكەۋدە وتەدى.