الماتى دارىگەرلەرى 107 كۇن بويى نارەستەنىڭ ءومىرى ءۇشىن كۇرەستى
بۇگىن الماتىنىڭ پەريناتولوگيا جانە بالالار كارديوحيرۋرگياسى ورتالىعىنان 510 گرامم سالماقپەن ومىرگە كەلگەن نارەستە ۇيىنە شىعارىلدى، دەپ حابارلايدى Almaty-akshamy.kz.
الماتى قالالىق قوعامدىق دەنساۋلىق ساقتاۋ باسقارماسىنان حابارلاعانداي، نارەستە وتكەن جىلى 11 قازاندا، اناسىنىڭ جۇكتىلىگىنىڭ 25 اپتاسىندا ومىرگە كەلگەن.
الماتى دارىگەرلەرى 107 كۇن بويى نارەستەنىڭ ءومىرى ءۇشىن كۇرەسكەن.
«ۇيدە قاعاناق سۋى كەتە باستاعان سوڭ بىردەن جەدەل جاردەم شاقىردىم. ولار مەنى وسى ورتالىققا الىپ كەلدى. مۇندا ماعان بارلىق تەكسەرۋ جۇرگىزىلدى، سودان كەيىن تولعاق باستالدى. ءوزىم بوساندىم، بالانى تۋعاننان كەيىن بىردەن رەانيماسياعا الىپ كەتتى»، - دەيدى بالانىڭ اناسى.
ورتالىقتىڭ انەستەزيولوگتارى ءبىر جارىم اي بويى بالانىڭ ءومىرى ءۇشىن كۇرەسەدى.
دارىگەر نەوناتولوگ-رەانيماتولوگ انەل بەيسەيەۆانىڭ ايتۋىنشا، نارەستە 30 كۇن بويى وكپەنى جاساندى جەلدەتۋ اپپاراتىندا جاتقان جانە قاجەتتى بارلىق مەديسينالىق كومەكتەر جۇرگىزىلگەن سوڭ عانا وكپەنى ءينۆازيۆتى ەمەس جەلدەتۋگە اۋىستىرىلعان.
38ء-شى كۇنى بالا ءوز بەتىنشە دەم الا باستادى.
«بالا اناسىمەن بىرگە «قىرىق كۇن» مەرەكەسىن وسىندا اتاپ ءوتتى. ءبىز «قىرقىنان شىعارۋ» ءراسىمىن وتكىزدىك، بالانى جۋىندىردىق، تىرناعىن، شاشىن الدىق، جالپى وسى راسىمدەگى بارلىق ىس-ارەكەتتەردى جاسادىق. ارينە، سونداي-اق رەانيماسيا ۇجىمى انا مەن بالاعا ءوز تىلەكتەرىن ءبىلدىردى»، - دەدى انەل بەيسەيەۆا.
ءومىرىنىڭ 42ء-شى كۇنى بالا قارقىندى تەراپيا پالاتاسىنا اۋىستىرىلدى.
بولىمشەنىڭ ەمدەۋشى دارىگەرى گۇلميرا جەلدىبايەۆانىڭ ايتۋىنشا، كىشكەنتاي پاسيەنتتىڭ جاعدايى اۋىر، ءبىراق تۇراقتى دەپ باعالاندى.
«بارلىق قاجەتتى تەراپيادان سوڭ ونىڭ جاعدايى تۇراقتاندى. بالا شالا تۋعاندىقتان، رەتينوپاتياسى بار ەكەنى بەلگىلى بولدى. وفتالمولوگ كورۋ قابىلەتىن تۇزەتۋ وپەراسياسىن جاسادى، ول ءساتتى ءوتتى. ءقازىر بالانىڭ جاعدايى ءبىرقالىپتى، بالا ءوز بەتىنشە ەمەدى، سالماق قوسىپ جاتىر. قازىرگى سالماعى - 2710 گرامم. بۇگىن ول ۇيىنە شىعارىلادى. ارينە، بولاشاقتا بالاعا امبۋلاتورلى تۇردە ماماندار قاراپ تۇرادى»، - دەدى ول.
ءوز كەزەگىندە ءسابيدىڭ اناسى بۇكىل مەديسينا قىزمەتكەرلەرىنە العىسىن ايتتى.
«مەن وسى ورتالىقتىڭ دارىگەرلەرىنە ۇلىمنىڭ ءومىرىن ساقتاپ قالعانى ءۇشىن شىن جۇرەكتەن العىس ايتامىن. ولار بولماسا، نە بولاتىنىن دا بىلمەيمىن. ارينە، مەنى بارلىق جاعىنان، اسىرەسە، مورالدىق جاعىنان قولداعان مەدبيكەلەر مەن سانيتارلارعا دا ۇلكەن راحمەت»، - دەدى بالانىڭ اناسى.