فينالدىق باسەكە سەنبى، 28 قاڭتار، كۇنى وتەدى
قازاقستاننىڭ ءبىرىنشى راكەتكاسى ەلەنا رىباكينانىڭ اۋستراليا اشىق چەمپيوناتى فينالىنداعى قارسىلاسى انىقتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەكىنشى جارتىلاي فينالدا الەمنىڭ 5-راكەتكاسى، بەلارۋس وكىلى ارينا سوبولەنكو دۇنيەجۇزىلىك رەيتينگىدە 45-ورىندا تۇرعان پولياك قىزى ماگدا لينەتتى 7:6 (7:1)، 6:2 ەسەبىمەن تىزە بۇكتىردى.
ءبىر جارىم ساعاتتان استام ۋاقىتقا سوزىلعان ماچتا ا. سوبولەنكو 6 ەيس جاساپ، 7 برەيك-پوينتتىڭ ۇشەۋىن پايدالانا ءبىلدى. قارسىلاسى 1 ەيس، 1 برەيكپەن شەكتەلدى.
وسىلايشا، بەلارۋس تەننيسشىسى ءوزىنىڭ سپورتتىق جولىندا العاش رەت «ۇلكەن دۋلىعا» ءتۋرنيرىنىڭ فينالىنا شىقتى.
وسىعان دەيىن ە. رىباكينا مەن ا. سوبولەنكو ءتورت رەت كەزدەسكەن، ەسەپ – 3:1، بەلارۋس سپورتشىسىنىڭ پايداسىندا. ءبىراق، بارلىق كەزدەسۋ دە تارتىستى ءوتىپ، ءۇش سەتپەن اياقتالعان.
فينالدىق باسەكە سەنبى، 28 قاڭتار كۇنى وتەدى.
ەسكە سالا كەتەيىك، بۇدان بۇرىن ەلەنا رىباكينانىڭ اۋستراليا اشىق چەمپيوناتىنىڭ فينالىنا العاش رەت شىققانىن جازعان بولاتىنبىز.
سونداي-اق، فينالعا شىققان ەلەنا رىباكينا 1 ملن استام دوللار تابىس تاپتى.
ەلەنا رىباكينا العاش رەت الەمدىك رەيتينگتە ۇزدىك وندىققا ەنەدى.