سونىمەن قاتار ەت ءوندىرىسى ءبىر جىلدا 6%-عا ارتقان.
قازان ايىندا ەتتىڭ باعاسى 2020 جىلعى قازانمەن سالىستىرعاندا 10،7%-عا ءوستى، - دەپ حابارلايدى Almaty-akshamy.kz Energyprom.kz سايتىنا سىلتەمە جاساپ.
بۇل بيىلعى جىلعى ءوسۋ قارقىنىنىڭ ەڭ جوعارى كورسەتكىشى.
وڭىرلىك ۇلەس تۇرعىسىندا ءبىر جىلدا ەتتىڭ باعاسى قوستاناي وبلىسىندا 4،1%-عا، تۇركىستان وبلىسىندا 18،4%-عا ءوستى. سونداي-اق ماڭعىستاۋ وبلىسىندا (16،6%-عا) جانە شىمكەنتتە (16،4%-عا) ايتارلىقتاي ءوسىم بايقالدى.
قاتتى قىمباتتاعان قوي ەتى مەن قۇس ەتى بولىپ تۇر– 15،7%-عا وسكەن. جىلقى ەتى – 11،2%-عا، شوشقا ەتى – 8،7%-عا، سيىر ەتى – 8،6%-عا قىمباتتادى.
قازان ايىندا قازاقستان رەسپۋبليكاسىنىڭ قالالارىندا جىلقى ەتىنىڭ ەڭ قىمبات باعاسى – ورتاشا ەسەپپەن كەلىسىنە 2557 تەڭگە بولدى. قوي ەتى (كگ 2399 تەڭگە) جانە سيىر ەتى (كگ 2234 تەڭگە) كەلەدى. قازاقستان رەسپۋبليكاسى قالالارىندا شوشقا ەتىنىڭ بولشەك ساۋداداعى باعاسى ورتاشا ەسەپپەن كەلىسىنە 1808 تەڭگەنى، تاۋىق ەتىنىڭ كەلىسىنە 1047 تەڭگەنى قۇرادى.
وسى كەزەڭدە ەت پەن قۇس ەتى، سونداي-اق ولاردان الىناتىن تاماق ونىمدەرىنىڭ ءوندىرىسى ءبىر جىلدا 6،4 پايىزعا ءوسىپ، بيىلعى جىلدىڭ قاڭتار-قىركۇيەك ايلارىندا 250،7 مىڭ تونناعا جەتتى. ونىڭ 194،8 مىڭ تونناسى قۇس ەتى، 55،9 مىڭ تونناسى ءىرى قارا، ۇساق مال، شوشقا، جىلقى ەتتەرى بولدى.
ءۇي قۇسىنىڭ ەتىن ءوندىرۋدىڭ 79%-ى تەك ءۇش وبلىستىڭ ۇلەسىنە تيەدى: الماتى (66،6 مىڭ توننا)، اقمولا (56 مىڭ توننا) جانە شىعىس قازاقستان (31،3 مىڭ توننا) وبلىستارى. وندىرىلگەن ەتتىڭ جارتىسىنان استامى دا تەك ءۇش وبلىستىڭ ۇلەسىنە ءتيدى: اقتوبە (14 مىڭ توننا)، قوستاناي (7،4 مىڭ توننا) جانە پاۆلودار (6،9 مىڭ توننا) وبلىستارى.
