ديەتولوگ اۆوكادو، شوكولاد جانە كوك شايدى ەستە ساقتاۋ قابىلەتىن جاقسارتاتىنىن ايتتى
ءبىرقاتار ازىق-تۇلىك ونىمدەرىن تاماقتانۋ راسيونىنا ەنگىزۋ ارقىلى ەستە ساقتاۋ قابىلەتىن جاقسارتۋعا بولادى. بۇل تۋرالى دارىگەر-ديەتولوگ الەكساندرا رازارەنوۆا مالىمدەدى، دەپ حابارلايدى Almaty-akshamy.kz ءتىلشىسى Lenta.ru-عا سىلتەمە جاساپ.
ەستە ساقتاۋ ءۇشىن ەڭ پايدالى بەس تاعامنىڭ ءبىرى، ول پايدالى مايلارعا، كالييگە، تالشىقتارعا جانە انتيوكسيدانتتارعا باي اۆوكادونى اتادى. پانتوتەن قىشقىلى ۇزاق مەرزىمدى ەستە ساقتاۋ قابىلەتىنە جاقسى اسەر ەتەدى، ول اعزادا جەتكىلىكسىز بولعاندا، ادام شارشايدى. دەگەنمەن، ارتىق سالماعى بار ادامدار اۆوكادونى كوپ پايدالانباۋ كەرەك، سەبەبى ونىڭ كالورياسى وتە جوعارى.
روزمارين (گۇلشەتەن) كوگنيتيۆتى فۋنكسيا مەن كونسەنتراسياعا پايدالى، دەيدىڭ مامان. ونىڭ قۇرامىندا ويلاۋ پروسەستەرىنە قاجەتتى اسەتيلحولين بار. ءزايتۇن مايىن ۇنەمى تۇتىنۋ ەستە ساقتاۋدى نىعايتۋعا جانە اعزاداعى توكسيندەردى بەيتاراپتاندىرۋعا كومەكتەسەدى. سونىمەن بىرگە، ونى السگەيمەر اۋرۋىنا قارسى ءتيىمدى پروفيلاكتيكا رەتىندە تاعايىندايدى.
EGCG انتيوكسيدانتى جاسىل شايدا كەزدەسەدى: ول ەستە ساقتاۋ قابىلەتىنە وڭ اسەر ەتەدى. ونى دەگەنەراسيالىق بۇزىلۋلاردان اۋلاق بولعىسى كەلەتىندەر ءۇشىن ءىشۋ قاجەت. سۋسىنداعى L-تەانين وقۋ قابىلەتىن جانە جالپى جۇمىس ىستەۋ قابىلەتىن ارتتىرادى.
قۇرامىندا كاكاو كوپ بولاتىن شوكولادتا ميدى وتتەگىمەن قامتاماسىز ەتەتىن ورگانيكالىق زاتتار بار. اسىرەسە، قارا شوكولادتىڭ پايداسى كوپ، ول ۇيقىشىلدىقتى جەڭۋگە كومەكتەسەدى جانە جالپى تونۋستى جاقسارتادى.
بۇعان دەيىن امەريكالىق پسيحياتر ۋما نايدۋ دا مي جاسۋشالارىنىڭ ساۋ بولۋى ءۇشىن قارا شوكولاد جەۋگە كەڭەس بەرگەن بولاتىن.