قازىرگى كەزدە الاكول اۋدانىندا تۇرعىن ءۇي كەزەگىندە 1511 ادام تۇر
ءۇشارال قالاسىندا «نۇرلى جەر» باعدارلاماسىمەن سالىنعان بەس قاباتتى 20 پاتەرلىك 2 تۇرعىن ءۇي پايدالانۋعا بەرىلدى. ءۇي كەزەگىندە تۇرعاندار، سونىڭ ىشىندە، كوپ بالالى وتباسىلار، اتا-اناسىنىڭ قامقورلىعىنسىز قالعان بالالار، حالىقتىڭ باسقا دا الەۋمەتتىك ءالجۋاز توپتارى كوپتەن كۇتكەن قۋانىشقا كەنەلدى، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
قازىرگى كەزدە الاكول اۋدانىندا تۇرعىن ءۇي كەزەگىندە 1511 ادام تۇر. سولاردىڭ ىشىندەگى 40 ادام سالىنىپ بىتكەن ەكى تۇرعىن ءۇي پاتەرلەرىنىڭ كىلتىن قولدارىنا الدى. جاڭا قونىس يەلەرىن قۋانىشتارىمەن قۇتتىقتاعان اۋدان اكىمى الماس ءابدينوۆ جۋىق ارادا ءۇشارال قالاسىندا تاعى ءبىر 60 پاتەرلىك جالگەرلىك ءۇي سالىناتىنىن ايتتى.
ىسكە قوسىلعان كوپ قاباتتى ۇيلەردىڭ قۇرىلىسى 2021 جىلدىڭ مامىر ايىندا باستالىپ، وتكەن جىلدىڭ قاڭتار ايىندا اياقتالعان بولاتىن. قۇرىلىس-مونتاج جۇمىستارىن «باعالى – الاكول» ج ش س مەردىگەر كومپانياسى جۇرگىزدى. ۇيلەردە ەكى جانە ءۇش بولمەلى پاتەرلەر سانى 10-نان، ءبىر بولمەلى پاتەر سانى - 20.
جالپى، جەتىسۋ وبلىسىندا تۇرعىن ءۇي سالۋ جۇمىستارى جوسپارلى تۇردە جۇرگىزىلۋدە. وتكەن جىلى 295 مىڭ شارشى مەتر تۇرعىن ءۇي بوي كوتەرگەن. بيىل دا قۇرىلىستىڭ وسى قارقىنى ساقتالادى، اتاپ ايتقاندا، بيۋدجەت قارجىسىنا 161،9 مىڭ شارشى مەتر، سول سياقتى كوممەرسيالىق تۇرعىن ءۇي 21،1 مىڭ شارشى مەتر سالىنادى.