پسيحياتر-دارىگەر الەكساندر مەششەرياكوۆ جادتى جاتتىقتىرۋعا كومەكتەسەتىن ءۇش جاتتىعۋدى ايتتى. سونىڭ ءبىرى - "ەستە ساقتاۋ سارايى"، ونى ارتۋر كونان ءدويلدىڭ قيالىنان تۋعان دانىشپان دەتەكتيۆ شەرلوك حولمس تا قولدانعان. دارىگەردىڭ ايتۋىنشا، بۇل ءادىس وتە ءتيىمدى، - دەپ حابارلايدى aqshamnews.kz ءتىلشىسى "دوكتور پيتەرگە" سىلتەمە جاساپ.
"وزىڭىزگە جاقسى تانىس ورىندى (پاتەرىڭىزدى، جۇمىسقا باراتىن جولدى) ەلەستەتىڭىز. ەستە ساقتاۋ كەرەك دەرەكتەردى ويشا سول "سارايعا" ورنالاستىرىڭىز. قايتا ەسكە ءتۇسىرۋ كەرەك بولعاندا، وسى "سارايىڭىزعا" كىرىپ، ويشا ءبىر اينالىپ ءوتىڭىز"، - دەپ جازدى مامان ءوزىنىڭ تەلەگرام-ارناسىندا.
"ەستە ساقتاۋ سارايى"
"ەستە ساقتاۋ سارايى" ءادىسىنىڭ شىنىمەن پايدالى ەكەنى نيدەرلاندتىق عالىمداردىڭ زەرتتەۋىمەن دە راستالدى. ولار ەكى تاجىريبە جۇرگىزدى.
بىرىنشىسىنە جەدەل جاتتاۋ بويىنشا الەمدىك جارىستارعا قاتىسقان 17 "چەمپيون" جانە ولارعا جاسى مەن ينتەللەكت دەڭگەيى بويىنشا سايكەس كەلەتىن 16 قاراپايىم ادام كىردى. ەكىنشى تاجىريبەدە بۇرىن ەستە ساقتاۋ ادىستەرىنە ۇيرەنبەگەن 50 ادام قاتىستى. ولاردى شامامەن تەڭ ءۇش توپقا ءبولدى: ءبىرىنشىسى ءبىر جارىم اي بويى "ەستە ساقتاۋ سارايىن" قولداندى، ەكىنشىسى باسقا ءبىر ءادىستى ۇيرەندى، ءۇشىنشىسى مۇلدە جاتتىققان جوق.
كەيىن بارلىعىنا سىناق جاسالدى: ۇزىن سوزدەر ءتىزىمىن رەتىمەن جاتتاپ، كەيىن ونى قايتادان رەتىمەن ايتىپ بەرۋ كەرەك ەدى. "ەستە ساقتاۋ سارايىن" قولدانعاندار جاقسى ناتيجە كورسەتتى: ولار 20 مينۋتتان كەيىن دە، ءبىر تاۋلىكتەن كەيىن دە كوبىرەك ءسوزدى ەسكە ءتۇسىردى. ءتورت اي وتكەننەن سوڭ تەكسەرىستە دە ۇقساس ناتيجە الىندى: بۇل توپ ورتا ەسەپپەن 50 ءسوزدى قايتا ايتتى، ال قالعان ەكى توپتا - تيىسىنشە 30 جانە 27 ءسوز بولدى.
پسيحياتر مەششەرياكوۆ شىنىمەن جۇمىس ىستەيتىن 5 قۇرالدى اتادى:
جاد ءۇشىن پايدالى تاعى ەكى جاتتىعۋ
- باقىلاۋ
كەز كەلگەن زاتتى تاڭداڭىز. 2–3 مينۋت بويى ونىڭ ءپىشىنىن، ءتۇسىن، تەكستۋراسىن، ءيىسىن، جارىقتىڭ شاعىلۋىن مۇقيات زەرتتەڭىز.
سوسىن كوزىڭىزدى جۇمىپ، سول زاتتى بۇگە-شىگەسىنە دەيىن ويشا ەلەستەتىڭىز.
مەششەرياكوۆتىڭ ايتۋىنشا، بۇل - زەيىن پراكتيكاسىنان الىنعان جاتتىعۋ، ول نازار اۋدارۋدى، جادتى وتە جاقسى جاتتىقتىرىپ، سترەستى تومەندەتەدى.
- دوسىڭا قايتا ايتىپ بەرۋ
ماقالانى، كىتاپتىڭ ءبولىمىن نەمەسە باسقا اقپاراتتى وقىڭىز.
كەيىن نەگىزگى ويدى ويشا قيالداعى ادامعا بارىنشا تۇسىنىكتى ءارى قىزىق ەتىپ "قايتا ايتىپ" بەرىڭىز.
پسيحياتردىڭ ايتۋىنشا، بۇل تەحنيكا ميعا جاتتالعان سوزدەردى جاي قايتالاۋعا ەمەس، اقپاراتتى قايتا قۇرىلىمداۋعا ءماجبۇر ەتەدى.