ونەركاسىپ جانە قۇرىلىس مينيسترلىگى قارۋ-جاراق پەن اسكەري تەحنيكانى ساۋداسىنان بيۋدجەتكە قالاي 1،1 ملرد تەڭگە كىرىس تۇسكەنىن ءتۇسىندىردى، دەپ حابارلايدى aqshamnews.kz.
ساۋالدى مينيسترلىككە Kazinform اقپاراتتىق اگەنتتىگى جولداعان.
قارجى مينيسترلىگىنىڭ 2024 جىلدىڭ 1 تامىزعا ارنالعان بيۋدجەتتىڭ اتقارىلۋى تۋرالى ەسەبىندە قارۋ-جاراق پەن اسكەري تەحنيكا ساتۋدان بيۋدجەتكە 1 ملرد 97 ملن 709 مىڭ تەڭگە تۇسكەنى ايتىلعان. ال ەلىمىزدە 2025 جىلعا دەيىن قارۋ جاراق پەن اسكەري تەحنيكا ساتۋعا شەكتەۋ قويىلعان. ونەركاسىپ جانە قۇرىلىس مينيسترلىگى اتالمىش شەكتەۋ تۇرعان كەزدە قارۋ-جاراق پەن اسكەري تەحنيكا قايدا ساتىلعانىن ءتۇسىندىردى.
«ق ر ۇكىمەتىنىڭ 2019 جىلعى 29 تامىزداعى № 637 قاۋلىسىنا سايكەس «قازارناۋلىەكسپورت» رەسپۋبليكالىق مەملەكەتتىك كاسىپورنى زاڭنامادا بەلگىلەنگەن تارتىپپەن ق ر قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ، ارناۋلى مەملەكەتتىك جانە قۇقىق قورعاۋ ورگاندارىنىڭ پايدالانىلمايتىن مۇلكىن وتكىزۋدى (ەكسپورتتاۋدى) جانە جويۋدى جۇزەگە اسىراتىن ۋاكىلەتتى ۇيىم بولىپ ايقىندالعان. وسى كاسىپورىن 2024 جىلعى قاڭتاردان باستاپ شىلدەگە دەيىن 34 ەلەكتروندىق ساۋدا-ساتتىق جۇرگىزدى. 1 ملرد 675،1 ملن تەڭگە سوماسىنا 233 پايدالانىلمايتىن مۇلىكتى ساتىپ الۋ-ساتۋ شارتى جاسالدى. ونىڭ ىشىندە 151 شارت ورىندالدى. بۇدان باسقا، 59،7 ملن تەڭگە سوماسىنا 7 شارت بۇزىلدى جانە ساتىپ الۋشىلار 57،1 ملن تەڭگە سوماسىنا 7 شارتقا قول قويمادى. 135 اسكەري ءبولىم مەن مەكەمەلەردەن پايدالانىلمايتىن مۇلىكتى شىعارۋ جۇزەگە اسىرىلادى. ونىڭ ىشىندە قورعانىس مينيسترلىگىنەن – 75، ۇلتتىق قاۋىپسىزدىك كوميتەتى شەكارا قىزمەتىنەن – 36، ىشكى ىستەر مينيسترلىگى ۇلتتىق ۇلاننان – 20، توتەنشە جاعدايلار مينيسترلىگىنەن – 4 مۇلىك شىعارىلدى»، - دەپ جازىلعان جاۋاپتا.