19 جەلتوقسان كۇنى سەنات دەپۋتاتتارى ەسىرتكى زاتتارىنىڭ زاڭسىز اينالىمىنا قارسى ءىس-قيمىل بويىنشا زاڭناماعا ەنگىزىلگەن تۇزەتۋلەردى ماقۇلدادى. بۇل وزگەرىستەر ناركوبيزنەس قۇرىلىمىنداعى قاراپايىم كۋرەرلەر مەن ۇيىمداستىرۋشىلارعا قاتىستى جازانى ايقىنداۋدى كوزدەيدى: كۋرەرلەرگە جازا جەڭىلدەتىلسە، ۇيىمداستىرۋشىلارعا قاتاڭداتىلادى.
وسى ۋاقىتقا دەيىن ناركورىنوك ويىنشىلارى اراسىندا ناقتى ايىرماشىلىق جاسالماعان. سوتتار شاعىن كولەمدە ەسىرتكى تاراتقان كۋرەرلەر مەن ءىرى ناركولابوراتوريالاردى باسقاراتىن قىلمىستىق توپ جەتەكشىلەرىنە بىردەي قاتاڭ جازا تاعايىنداپ كەلگەن. مۇنداي ءتاسىل زاڭ جۇيەسىنىڭ ادىلدىگىنە قاتىستى سۇراقتار تۋىنداتقان ەدى.
ەندى زاڭناماعا ەنگىزىلگەن تۇزەتۋلەر اياسىندا ق ر قىلمىستىق كودەكسىنىڭ 297-بابىنا وزگەرىستەر ەنگىزىلەدى:
- ەسىرتكى تاسىمالداۋ، ساقتاۋ نەمەسە جىبەرۋ ءۇشىن بۇرىنعىداي 10 جىل ەمەس، 8 جىلعا دەيىن باس بوستاندىعىنان ايىرۋ جازاسى تاعايىندالادى.
- ءىرى كولەمدە ەسىرتكى تاراتقانى ءۇشىن بۇرىن 15 جىل جازا بەرىلسە، ەندى بۇل مەرزىم 12 جىلعا دەيىن قىسقارادى.
جازا جەڭىلدەگەنىمەن، ەندى بارلىق جاعدايدا قوسىمشا جازا رەتىندە مۇلىكتى تاركىلەۋ ەنگىزىلەدى. بۇرىن سوتتا مۇلىكتىڭ قىلمىستىق جولمەن تابىلعانى دالەلدەنگەن جاعدايدا عانا تاركىلەۋ جۇزەگە اسىرىلسا، ەندى بۇل تالاپ اۆتوماتتى تۇردە ورىندالادى.
پوليسيا قىزمەتكەرلەرىنە بۇل وزگەرىستەر تەرگەۋ امالدارىنا قوسىمشا جۇكتەمە ءتۇسىرۋى مۇمكىن. ەندى مۇلىكتى تاركىلەۋ جانە ءاربىر ءىستى جاڭا ەرەجەلەرگە سايكەس كەلتىرۋ ءۇشىن ناقتى دالەلدەمەلەر جيناۋ قاجەت. بۇل پروسەسس قىلمىستىق ىستەردىڭ ساپالى قارالۋىن تالاپ ەتەدى.
جازانى جەڭىلدەتۋ ءبىر جاعىنان زاڭ جۇيەسىن ادىلەتتى ەتۋگە قادام بولسا، ەكىنشى جاعىنان مۇلىكتى تاركىلەۋ ءتارىزدى قوسىمشا شارالار ارقىلى ەسىرتكى بيزنەسىنە توسقاۋىل قويۋدى كوزدەيدى. بۇل وزگەرىستەر سوت جۇيەسىنە عانا ەمەس، قۇقىق قورعاۋ ورگاندارىنا دا جاڭا مىندەتتەر جۇكتەپ وتىر. ەندى وسى رەفورمالاردىڭ ناقتى ناتيجەسىن ۋاقىت كورسەتەدى.