اقتوبە وبلىسىندا ەسىرتكى قىلمىسىنا قارسى ءىس-قيمىل ءبولىنىسىنىڭ قىزمەتكەرلەرى وڭتۇستىك وڭىردەن ەسىرتكى جەتكىزۋ ارناسىنىڭ جولىن كەستى، دەپ حابارلايدى almaty-akshamy.kz
"اقتوبەدە قالا تۇرعىنى تىزگىندەگەن Toyota Alphard اۆتوكولىگى توقتاتىلدى. كولىكتى ءتىنتۋ كەزىندە جۇكسالعىشتا وسىمدىك تەكتەس، جاسىل ءتۇستى، ەرەكشە ءيىسى بار زات سالىنعان جانە سكوچپەن ورالعان التى پوليمەرلى قاپ تابىلىپ، تاركىلەندى. ساراپتاما قورىتىندىسىنا سايكەس تاركىلەنگەن زات سالماعى 57،5 كگ ماريحۋانا ەكەنى انىقتالدى"، – دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ.
ارى قاراي جۇرگىزىلگەن جەدەل-ىزدەستىرۋ ءىس-شارالارى ناتيجەسىندە تاعى ءبىر كۇدىكتى ۇستالدى. ونىڭ گاراجىنان وسىمدىك تەكتەس زاتتار بار ەكى ۇلكەن قارا پاكەت تابىلىپ، تاركىلەندى. تاركىلەنگەن زات سالماعى 20 كگ بولاتىن ماريحۋانا بولىپ شىقتى. مەديسينالىق كۋالاندىرۋ قورىتىندىسىنا سايكەس ەكىنشى كۇدىكتى ۇستالعان ساتىندە ەسىرتكىلىك ماساڭ كۇيدە بولعان. جالپى سالماعى 77 كگ-نان اساتىن بۇل ەسىرتكىلەردى اتالعان ادامدار وڭىرگە جەتكىزىپ، كەيىننەن ساتۋ ماقساتىندا ساقتاعان.
"قىلمىسقا قاتىسى بار باسقا ادامداردى انىقتاۋ بويىنشا شارالار جالعاسىپ جاتىر. ەستەرىڭىزگە سالا كەتەيىك، ۇيىمداسقان قىلمىستىق توپتىڭ قۇرامىندا جاسالعان وسى قىلمىس ءۇشىن ۇستالعاندارعا 15 جىلعا دەيىن باس بوستاندىعىنان ايىرۋ جازاسى قاراستىرىلادى. تەرگەۋ مۇددەسى ءۇشىن باسقا اقپارات جاريا ەتىلمەيدى"، – دەدى ءامىرحانوۆ.