وعان قۇپيا قۇجاتتاردى زاڭسىز ساقتادى جانە تاراتتى دەپ ايىپ تاعىلىپ، 37 قىلمىستىق ءىس قوزعالدى.
بۇگىن دونالد ترامپ فلوريدا قالاسىنا جەكە ۇشاعىمەن كەلىپ قوندى، دەپ حابارلايدى Almaty-akshamy.kz.
ول ەرتەڭ سوت وتىرىنا قاتىسىپ، وزىنە تاعىلعان ايىپتاردى تىڭدايدى. اقش-تىڭ بۇرىنعى پرەزيدەنتى مەن كومەكشىسىنە اۋىر ايىپتار تاعىپ وتىر. ونىڭ ىشىندە جالعان كۋالىك ەتۋ، قىلمىستىق ىمىرا جاساپ، قۇپيا ماتەريالداردى ءتيىستى دەڭگەيدە ساقتامادى جانە جاسىردى دەلىنگەن.
فەدەرالدى تەرگەۋ بيۋروسى بىلتىر تامىزدا ترامپتىڭ ءۇيىن ءتىنتىپ، «اسا قۇپيا» ءمورى بار ونداعان قۇجاتتى تاركىلەگەن ەدى، دەپ جازادى 24.kz. ونىڭ ءبىر بولىگى ءتىپتى ءۇي قويماسىنان تابىلدى. قىلمىستىق ىستەردىڭ ءار تارماعى بويىنشا ەكس پرەزيدەنتكە قوماقتى ايىپپۇل سالىنىپ، ءتىپتى بىرنەشە جىلعا دەيىن باس بوستاندىعىنان ايىرىلۋى مۇمكىن.
- ۇلتتىق قاۋىپسىزدىككە قاتىستى مالىمەتتەردى قورعايتىن زاڭدارىمىز اقش ءۇشىن وتە ماڭىزدى جانە بۇلجىتپاي ورىندالۋى ءتيىس. بۇل زاڭداردىڭ بۇزىلۋى ءبىزدىڭ ەلىمىزدى قاۋىپ-قاتەرگە ۇشىراتادى. زاڭ ۇستەمدىگىن ساقتاۋ ادىلەت دەپارتامەنتىنىڭ نەگىزگى ۇستانىمى. سوندىقتان بۇل ەلدە زاڭ تالاپتارى بارلىعىنا ورتاق، - دەيدى قۇپيا قۇجاتتار بويىنشا ارنايى كەڭەسشى دجەك سميت.
ايىپتاۋ اكتىسىنىڭ ەڭ نەگىزگى بولىگىن اقش-تىڭ يادرولىق قارۋ باعدارلاماسى مەن ونىڭ وداقتاستارىنىڭ وسال تۇستارى تۋرالى دەرەكتەر قۇرايدى. شابۋىل جاسالعان جاعدايدا، اقش-تىڭ قارىمتا سوققىسى قارالعان قۇپيا قۇجاتتار دا تراپتىڭ ۇيىنەن تابىلعان.
«بۇل دەرەكتەر قولدى بولسا، حالىقارالىق قاتىناستارعا، اقش-تىڭ اسكەري نىساندارى مەن تىڭشىلارىنىڭ قاۋىپسىزدىگىنە، سونداي-اق قۇپيا بارلاۋ تاسىلدەرىن ودان ءارى پايدالانۋعا ءقاۋىپ ءتوندىرۋى مۇمكىن»، - دەلىنگەن حابارلامادا.
ال ترامپ وسىنداي اسا قۇپيا قۇجاتتاردىڭ كەيبىرىن كورۋگە قۇقى جوق ادامدارعا اشقان.
«وسىلايشا ەكس پرەزيدەنت ۇلتقا ۇلكەن قاتەر ءتوندىرىپ، تىڭشىلىق تۋرالى زاڭ تالابىن بۇزدى»، - دەيدى پروكۋرورلار.
ارينە، دونالد تراپم وزىنە تاعىلعان ايىپتاردى مويىندامادى. 2024 جىلى وتەتىن سايلاۋعا تۇسۋىمە كەدەرگى جاساماقشى دەپ سىنادى.
- شىنىمدى ايتسام بۇل قۇجاتتاردىڭ قانشالىقتى قۇپيا بولعانىن كورىپ شوشىدىم. ەگەر ايىپتاۋ اكتىسىنىڭ جارتىسى شىندىققا جاناسسا، وندا ەكس پرەزيدەنت ۇلكەن پروبلەماعا تاپ بولدى دەگەن ءسوز. ياعني بۇل - بۇلتارتپاس ايىپتاۋ. ال ترامپتىڭ ءوزىن ساياسي ويىننىڭ قۇربانى رەتىندە كورسەتۋگە تىرىسۋى اقىماقتىق، دەيدى اقش-تىڭ بۇرىنعى باس پروكۋرورى ۋيليام بارر.
اقش-تىڭ 45ء-شى پرەزيدەنتى 2021 جىلى اق ءۇيدى بوساتقان كەزدە قۇپيا قۇجاتتاردى ءتيىستى جەرگە تاپسىرماعان. ۇكىمەت قانشا سۇراۋ سالسا دا ونى قايتارۋدان باس تارقان، ءتىپتى ولاردى ءبىر ۇيىنەن ەكىنشىسىنە كوشىرىپ، فەدەرالدى تەرگەۋ بيۋروسىنان جاسىرۋعا تىرىسقان. بۇنى دالەلدەيتىن ۆيدەو جانە اۋديو جازبالار، كۋاگەرلەردىڭ تۇسىنىكتەمەلەرى بار دەيدى تەرگەۋشىلەر. اقش تاريحىندا العاش رەت ەكس پرەزيدەنتتىڭ ۇستىنەن فەدەرالدىق دەڭگەيدە قىلمىستىق ءىس قوزعالىپ وتىر.