مەكتەپ ءبىتىرۋشى تۇلەكتەردىڭ قاۋىپسىزدىگىن قامتاماسىز ەتۋگە جانە قۇقىق بۇزۋشىلىققا جول بەرمەۋ ءۇشىن بارلىق وتكىزىلەتىن ءىس شارالار مەكتەپ اۋلاسىندا وتەدى
16 ماۋسىم كۇنى وبلىستاعى بارلىق ءبىلىم بەرۋ ۇيىمدارىندا اتتەستات تاپسىرۋ ءراسىمى وتكىزىلەدى، دەپ حابارلايدى Almaty-akshamy.kz.
وسىعان بايلانىستى مەكتەپ ءبىتىرۋ كەشىن مەيرامحانالاردا نەمەسە ويىن-ساۋىقتىق ورتالىقتاردا وتكىزۋگە قاتاڭ تىيىم سالىنادى. تيىسىنشە، مەكتەپ ءبىتىرۋ كەشى ءبىلىم وردالارىنىڭ اۋلاسىندا قاراپايىم تۇردە ۇيىمداستىرىلادى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە وبلىستىق ءبىلىم باسقارماسىنىڭ ءبولىم باسشىسى نۇرلان داۋلەتالييەۆ مالىمدەدى.
وڭىردە نەگىزگى ورتا ءبىلىم تۋرالى اتتەستاتتى الاتىن، ياعني 9 سىنىپتى بىتىرۋشىلەر سانى – 14 543 قۇراسا، ونىڭ 1 765ء-ى «ۇزدىك اتتەستات» يەگەرى. ال 11 سىنىپتى ءبىتىرۋشى تۇلەكتەر سانى – 7506 وقۋشى. ونىڭ 415ء-ى «التىن بەلگىگە» ۇمىتكەر بولسا، 804 وقۋشى «ۇزدىك اتتەستات» يەگەرى.
«مەكتەپ ءبىتىرۋشى تۇلەكتەردىڭ قاۋىپسىزدىگىن قامتاماسىز ەتۋگە جانە قۇقىق بۇزۋشىلىققا جول بەرمەۋ ءۇشىن بارلىق وتكىزىلەتىن ءىس شارالار مەكتەپ اۋلاسىندا وتەدى. بۇل شاراعا بارلىق وقۋشىلار مەكتەپ فورماسىمەن قاتىسۋعا مىندەتتى. سونىمەن قاتار، مەكتەپ ءبىتىرۋشى تۇلەكتەردىڭ تابيعات اياسىنا نەمەسە سۋ ايدىندارىنا بارۋىنا بولمايتىنىن ەسكەرتەمىز. بالالاردىڭ قاۋىپسىزدىگىن قامتاماسىز ەتۋ ءۇشىن مەديسينا قىزمەتكەرلەرى، ءورت ءسوندىرۋ ماماندارى جانە ىشكى ىستەر ورگاندارى جۇمىلدىرىلدى. ادامدار كوپ شوعىرلاناتىن دەمالىس ورىندارى مەن ويىن-ساۋىق ورتالىقتارىنا مەكتەپ اكىمشىلىگىنەن قۇرالعان كەزەكشىلىك توپ رەيد جۇمىستارىن جۇرگىزەدى. تاعى ءبىر ەسكەرتەتىن ءجايت، اتا-انالار تاراپىنان اقشا نەمەسە سىيلىقتار بەرىلۋىنە تىيىم سالىنادى»، - دەدى وبلىستىق ءبىلىم باسقارماسىنىڭ ءبولىم باسشىسى نۇرلان داۋلەتالييەۆ.
قوعامدىق ءتارتىپتى ساقتاۋ ماقساتىندا ءاربىر ءبىلىم بەرۋ وردالارىندا 2 پوليسيا دەپارتامەنتىنىڭ قىزمەتكەرى بەكىتىلگەن. ولار كۇشەيتىلگەن رەجيمدە جۇمىس ىستەيتىن بولادى.
«ەرتەڭگى بولاتىن اتتەستات تاپسىرۋ ءراسىمى كەزىندە قاۋىپسىزدىكتى بارىنشا ساقتاۋعا پوليسيا دەپارتامەنتىنىڭ قىزمەتكەرلەرى دايىن. قالا ىشىندە كولىكتەرمەن اۆتوشەرۋ وتكىزۋگە بولمايتىنىن ەسكەرتەمىز. اسىرەسە تاڭدى قارسى الۋ ءۇشىن سۋ جاعالاۋلارىنا بارۋعا بولمايدى. ەگەر دە ەسكەرتۋگە قاراماستان قۇقىق بۇزۋشىلىق ورىن العان جاعدايدا مەكتەپ ءبىتىرۋشى تۇلەكتەردىڭ زاڭدى وكىلدەرىنە اكىمشىلىك شارا قارالادى»، - دەدى وبلىستىق پوليسيا دەپارتامەنتىنىڭ جەرگىلىكتى پوليسيا قىزمەتi باسقارماسى باستىعىنىڭ ورىنباسارى باقىت مولدابەكوۆ.