بۇل سىيلىقتىڭ ەرەكشەلىگى – ۇزدىك دەپ تانىلعان شىعارمالار باسىپ شىعارىلىپ، كىتاپحانالارعا تاراتىلادى
قازاقستان رەسپۋبليكاسى مادەنيەت جانە سپورت مينيسترلىگى «ايبوز» ۇلتتىق تۇڭعىش ادەبي سىيلىعىنا بايقاۋ جاريالادى، دەپ حابارلايدى Almaty-akshamy.kz مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
«ۇزدىك پروزا»، «ۇزدىك پوەزيا»، «ۇزدىك دراما»، «ۇزدىك كوركەم اۋدارما»، «ۇزدىك بالالار ادەبيەتى»، «ۇزدىك كوميكس» جانە «كىتاپتىڭ ۇزدىك ديزاينى» نوميناسيالارى بويىنشا جەڭىمپاز اتانعاندار 5 ميلليون تەڭگەدەن اقشالاي سىيلىق الادى.
كونكۋرس ناتيجەسىنەن سوڭ ولاردىڭ ەڭبەكتەرى 500 دانامەن جارىق كورەدى.
بۇگىن ۇلتتىق ادەبي سىيلىقتىڭ تۇساۋكەسەرى زيالى قاۋىم وكىلدەرىنىڭ، اقىن-جازۋشىلاردىڭ قاتىسۋىمەن ءوتتى. مادەنيەت جانە سپورت ءمينيسترى داۋرەن ابايەۆ بۇل جوبانىڭ مىندەتى – ادەبيەتشىلەردى قولداۋ عانا ەمەس، سونىمەن قاتار جازۋشىلىق ونەردىڭ ايرىقشا الەۋمەتتىك ماڭىزدىلىعىن قوعامعا كورسەتۋ ەكەنىن اتاپ ءوتتى.
«جاسىراتىن نەسى بار، «قازاق قالامگەرى قاشان نوبەل الادى؟»، «ۇلتتىق ادەبيەتىمىزدىڭ قازىرگى دەڭگەيى قانداي؟»، «قازاقشا اۋدارمانىڭ ءحالى نەشىك؟» دەگەن سۇراقتار كوبىمىزدىڭ كوكەيىمىزدە جۇرگەنى راس. قازاق زيالىلارىنىڭ ىقپالى قاشان ارتادى، ولار ۇلت ساناسىنا، قوعام ويىنا قالاي اسەر ەتەدى دەپ تە ءجيى ويلايتىنىمىز انىق. ارينە، بۇل ساۋالداردى ءار قىرىنان قاراستىرىپ، وعان ءتۇرلى جاۋاپ ىزدەي بەرۋگە بولادى. كەيبىر سۇراققا جاۋاپ تابارمىز، كەي تۇستا ءۇنسىز قالۋىمىز مۇمكىن. ءبىراق ءبىر اينىماس دۇنيە بار – ءبىزدىڭ ۇلتىمىز جالعىز، زيالىلارىمىز ساناۋلى-اق. سول ءۇشىن ۇلتىمىزدى ۇلىقتاپ، زيالىلارىمىزدى الاقانعا سالىپ، قۇرمەت تۇتۋعا ءتيىسپىز»،- دەدى مادەنيەت جانە سپورت ءمينيسترى داۋرەن ابايەۆ.
«باستى ماقساتىمىز – ءتول ادەبيەتىمىزدى تىڭ دۇنيەلەرمەن تولىقتىرىپ، ونى جاڭاشا بيىككە كوتەرۋ، سونداي-اق، ۇلتىمىزدىڭ ادەبي مۇراسىن مولايتىپ، وتاندىق ادەبيەتكە جاڭا سەرپىن بەرۋ. بۇل سىيلىقتىڭ تاعى ءبىر ەرەكشەلىگى – ۇزدىك دەپ تانىلعان شىعارمالار باسىپ شىعارىلىپ، كىتاپحانالارعا تاراتىلادى. قاتىسۋشىلاردىڭ جاسىنا، ەڭبەك جانرىنا، جازۋ تىلىنە شەكتەۋ جوق. ەڭ باستىسى – شىعارما مازمۇندى، وزەكتى بولۋعا ءتيىس. قىسقا بولعانىمەن ەلدىڭ ەسىندە قالىپ، جۇرتشىلىقتىڭ اۋزىنان تۇسپەيتىندەي تۋىندى جازسا، بايگە سوعان بۇيىرادى. بۇل-وتاندىق كىتاپ شىعارۋ ءىسى مەن ادەبيەتتى قولداۋ باعىتىندا جۇزەگە اسىرىپ جاتقان ءىس-شارالاردىڭ ءبىرى عانا. ەل پرەزيدەنتى بەلگىلەپ بەرگەندەي، ءبىزدىڭ تۇپكى ماقساتىمىز – وقيتىن ۇلت قالىپتاستىرۋ. ول ءۇشىن ءبىز «جاڭا قازاق ادەبيەتى» سەرياسىن قوسا العاندا، جاس اۆتورلاردى قولداۋدىڭ جاڭاشىل تەتىكتەرىن قۇرىپ، مەملەكەتتىك سۋبسيديالاۋ كولەمىن ۇلعايتىپ جاتىرمىز. گرانتتار مەن سىيلىقتار جاريالاپ، كىتاپ جارمەڭكەلەرىن وتكىزىپ كەلەمىز. بولاشاقتا پروزا، پوەزيا جانە دراماتۋرگياداعى ەڭ مىقتى جاس تالانتتاردى قولداۋ جانە تابيعي قابىلەتىن شىڭداۋعا ارنالعان «ادەبي زەرتحانا» اشۋدى جوسپارلاپ وتىرمىز»، – دەدى داۋرەن ابايەۆ.
سونىمەن قاتار كەلەسى جىلدان باستاپ مادەنيەت جانە سپورت مينيسترلىگى قازاقستاندىق جاس جازۋشىلار مەن اقىندار ءۇشىن پرەزيدەنتتىڭ ارنايى ادەبي سىيلىعىن تاعايىنداۋدى كوزدەپ وتىر.
«سىيلىق 18-29 جاس ارالىعىنداعى جاس قالامگەرلەرگە «پروزا»، «پوەزيا»، «دراماتۋرگيا»، «بالالار ادەبيەتى» نوميناسيالارى بويىنشا بۇرىن جاريالانباعان شىعارمالارى ءۇشىن تابىستالادى. ودان بولەك بيىل «جاڭا قازاق ادەبيەتى» سەرياسىمەن كىتاپتار جارىق كورگەلى وتىر. بۇل سەريامەن بۇرىن شىعارماسى ەش جەردە جارىق كورمەگەن جاس اۆتورلاردىڭ تۋىندىلارى ىرىكتەلىپ، 3 مىڭ تيراجبەن باسىلىپ شىعارىلادى»، - دەدى باسشى.
كوبەلەكتىڭ قاناتىنان تۋعان تولقىن الىپ مۇحيتتاردى شايقايدى.
«ءبىزدىڭ شىعارماشىلىققا بەرەتىن بۇگىنگى سەرپىنىمىز ەرتەڭگى الەمدىك كلاسسيكانىڭ ىرگەتاسى ەكەنىنە شىن سەنۋىمىز كەرەك. اقىنىنىڭ قالامىن قادىرلەگەن، ءسوزدىڭ كيەسىنە سەنگەن جۇرت وزادى، جازۋشىسىنىڭ جاعدايىن ويلاعان ۇلتتىڭ بولاشاعى كەمەل. الەمدى وزگەرتەر ايگىلى شىعارمالار ءالى دە قازاق توپىراعىندا دۇنيەگە كەلەدى. جاڭا قازاق ادەبيەتىنىڭ جولايرىعىنداعى بۇگىنگى ساپار ءساتتى بولسىن! تالانتتى جازۋشىلارىمىز بەن ارقالى شايىرلارىمىزدىڭ قالامىنا شابىت تىلەيمىن!»، - دەپ اياقتادى ءسوزىن داۋرەن ابايەۆ.