الماتىلىقتارعا ۇرەيلەنبەي، سىرتقا شىعۋ ەسكەرتىلدى.
20 ساۋىردە الماتىدا جالپىقالالىق سەيسميكالىق وقۋ-جاتتىعۋ ءوتىپ، ساعات 11:00-دە قالا بويىنشا دابىل قوسىلادى، دەپ حابارلايدى Almaty-akshamy.kz قالالىق توتەنشە جاعدايلار دەپارتامەنتىنە سىلتەمە جاساپ.
"سەيسميكالىق وقۋ-جاتتىعۋ باستالماس بۇرىن، اپاتتىق سومكەنى دايىنداڭىز، ءقاۋىپسىز جەرگە شىعۋ جولىن انىقتاڭىز. ءقاۋىپسىز جەر - بۇل ەلەكتر جەلىلەرىنەن، اعاشتاردان جانە عيماراتتاردان الىس ورنالاسقان اشىق اۋماق. سەيسميكالىق وقۋ-جاتتىعۋ كەزىندە "بارشاڭىزدىڭ نازارىڭىزعا!" دابىلىن ەستىگەن كەزدە، سابىر ساقتاپ، عيماراتتان شىعىڭىزدار"، - دەلىنگەن الماتى قالاسى توتەنشە جاعدايلار دەپارتامەنتى حابارلاماسىندا.
ماماندار توتەنشە جاعدايلارعا دايىن بولۋ ادام ءومىرى مەن دەنساۋلىعىن ساقتاۋدىڭ كەپىلى ەكەنىن اتاپ ءوتتى.
"بارشاڭىزدى سەيسميكالىق وقۋ-جاتتىعۋعا بەلسەندى قاتىسۋدى سۇرايمىز!" – دەدى الماتى قالاسىنىڭ توتەنشە جاعدايلار دەپارتامەنتى وكىلدەرى.