ۇكىمەت پەن ۇلتتىق بانكتىڭ بىرلەسكەن ءىس-شارالارى قازاقستاندا ينفلياسيا قارقىنىن باياۋلاتۋعا مۇمكىندىك بەردى. بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە ۇكىمەت باسشىسى ءاليحان سمايىلوۆ ايتتى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
پرەمەر-مينيستر باعانى تۇراقتاندىرۋ ۇكىمەتتىڭ جانە جەرگىلىكتى اتقارۋشى ورگانداردىڭ اسا ماڭىزدى مىندەتتەرىنىڭ ءبىرى ەكەنىن باسا ايتتى. وسىعان بايلانىستى ۇكىمەت پەن ۇلتتىق بانك بىرلەسىپ ينفلياسيانى باقىلاۋ جانە تومەندەتۋ بويىنشا شارالار كەشەنىن ىسكە اسىرىپ جاتىر.
«ناتيجەسىندە، بيىلعى ناۋرىز ايىندا جىلدىق ينفلياسيا 18،1%-عا دەيىن باياۋلادى. كەيىنگى 4 اپتادا الەۋمەتتىك ماڭىزى بار ازىق-تۇلىك تاۋارلارى بويىنشا ينفلياسيا تىركەلگەن جوق. ءبىزدىڭ الدىمىزدا بيىل ينفلياسيانى 2 ەسەگە دەيىن تومەندەتۋ مىندەتى تۇر»، – دەدى ءاليحان سمايىلوۆ.
ونىڭ ايتۋىنشا، رەسپۋبليكادا حالىقتىڭ تابىسىن ارتتىرۋ باعدارلاماسى ىسكە اسىرىلىپ جاتىر. وسى ءىس-شارالار اياسىندا بيىل 3 ملن-نان استام ادامنىڭ جالاقىسى ءوستى.
«مەملەكەتتىڭ بارلىق الەۋمەتتىك مىندەتتەمەلەرى ۋاقتىلى جانە تولىق كولەمدە ورىندالىپ كەلەدى. اتاپ ايتقاندا، بيىلدان باستاپ 4،4 ملن ادامدى جوعارىلاتىلعان الەۋمەتتىك تولەمدەرمەن قامتۋعا 4،6 ترلن تەڭگە ءبولىندى»، – دەدى پرەمەر-مينيستر.
ۇكىمەت باسشىسى ۇلتتىق جوبالاردى ىسكە اسىرۋ، جاڭا وندىرىستەر اشۋ، شاعىن جانە ورتا بيزنەستى دامىتۋ، جاڭا جۇمىس ورىندارىن قۇرۋ ەسەبىنەن 1 ملن-عا جۋىق ادام جۇمىسپەن قامتىلاتىنىن ايتتى.