سەناتور ەرنۇر ايتكەنوۆ پاۆلودار وبلىسىنداعى اقسۋ قالاسى مەن ماي اۋدانىنىڭ مالايسارى اۋىلىنىڭ تۇرعىندارىمەن كەزدەسۋ بارىسىندا ەلىمىزدە اتوم ەلەكتر ستانساسىن سالۋ ماسەلەسىن تالقىلادى. بۇل كەزدەسۋلەر بارىسىندا دەپۋتات تۇرعىندارمەن پىكىر الماسىپ، اەس قۇرىلىسىنىڭ ەلىمىزدىڭ بولاشاعى ءۇشىن ستراتەگيالىق ماڭىزى بار ەكەنىن ءتۇسىندىردى.
اقسۋ قالاسىنىڭ الەۋمەتتىك جانە سپورت سالاسىنىڭ ۇجىمدارىمەن، سونداي-اق مالايسارى كەنتىنىڭ تۇرعىندارىمەن وتكەن كەزدەسۋلەردە سەناتور ايتكەنوۆ اەس سالۋ جوباسىنىڭ ەل ءۇشىن ماڭىزى زور ەكەنىن اتاپ ءوتتى. «اەس سالۋ – قازاقستاننىڭ ەنەرگەتيكالىق تاۋەلسىزدىگىن نىعايتۋعا باعىتتالعان ستراتەگيالىق قادام. پرەزيدەنتىمىز قاسىم-جومارت توقايەۆ ماڭىزدى شەشىمدەر قابىلداپ، ازاماتتاردىڭ پىكىرىن ەسكەرە وتىرىپ، جالپىۇلتتىق رەفەرەندۋم وتكىزۋدى ماقۇلدادى. بۇل ەلىمىزدىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ ناقتى ىسكە اسۋىنىڭ جارقىن مىسالى»، – دەدى ەرنۇر ايتكەنوۆ.
سەناتور سونىمەن قاتار حالىقتىڭ ءبىر بولىگى ەندى قولعا الىنعالى وتىرعان جاڭا سالالارعا قاتىستى الاڭداۋى مۇمكىن ەكەنىن اتاپ ءوتىپ، وسى ورايدا جوبانىڭ نەگىزگى جاقتارىن جان-جاقتى ءتۇسىندىردى. ول تۇرعىنداردان تۇسكەن كوكەيكەستى ساۋالدارعا جاۋاپ بەرىپ، جوبانىڭ ۇزاق مەرزىمدى ەكولوگيالىق جانە ەكونوميكالىق تيىمدىلىگىنە توقتالدى.
كەزدەسۋدە ەرنۇر ايتكەنوۆ تۇرعىنداردى 2024 جىلدىڭ 6 قازانىندا وتەتىن رەفەرەندۋمعا بەلسەندى قاتىسۋعا شاقىرىپ، ءاربىر ازاماتتىڭ داۋىسى ماڭىزدى ەكەنىن ايتتى. اقسۋ قالاسى مەن مالايسارى اۋىلىنىڭ تۇرعىندارى ءوز كەزەگىندە پرەزيدەنت باستامالارىنا قولداۋ ءبىلدىرىپ، جوباعا قاتىستى ءوز ۇسىنىستارى مەن تىلەكتەرىن جەتكىزدى. كەزدەسۋ بارىسىندا ەلىمىزدىڭ تۇراقتى دامۋىن قامتاماسىز ەتۋ ءۇشىن ءاربىر ازاماتتىڭ سانالى تاڭداۋىنىڭ ماڭىزدىلىعى ەرەكشە اتاپ ءوتىلدى.