پارلامەنت سەناتىنىڭ ءتوراعاسى ماۋلەن اشىمبايەۆ باستاعان اەس سالۋدى قولداۋ جونىندەگى حالىق شتابى اباي وبلىسىندا جۇمىسىن جالعاستىردى، دەپ حابارلايدى aqshamnews.kz
شتاب قۇرامىندا دەپۋتاتتار، ساراپشىلار جانە بەلسەندى ازاماتتار بار. ولار الداعى رەفەرەندۋمعا بايلانىستى ءاقپاراتتىق-تۇسىندىرۋ جۇمىستارىن جۇرگىزۋ اياسىندا اۋىلشارۋاشىلىق ونىمدەرىن وندىرۋشىلەرمەن، ءبىلىم بەرۋ سالاسىنىڭ ماماندارىمەن جانە كوممۋنالدىق قىزمەتتەر سالاسىنداعى ەڭبەك ۇجىمدارىمەن كەزدەسۋ وتكىزدى. كەزدەسۋلەردە ەكولوگيالىق جانە ەكونوميكالىق پروبلەمالاردى شەشۋ تۇرعىسىنان اەس سالۋدىڭ ماڭىزى تالقىلاندى.
ماۋلەن اشىمبايەۆ ءوز سوزىندە قازىرگى تاڭدا الەم كليماتتىڭ وزگەرۋى جانە ەكولوگيانىڭ ناشارلاۋى سياقتى ءتۇرلى سىن-قاتەرلەرمەن بەتپە-بەت كەلىپ وتىرعانىن اتاپ ءوتتى. سونىمەن قاتار، ول ەلەكتر ەنەرگياسىنىڭ تاپشىلىعىنىڭ كۇن ساناپ ارتىپ كەلە جاتقانىن تىلگە تيەك ەتتى. بۇگىنگى كۇنى قازاقستاندا وندىرىلەتىن ەنەرگيانىڭ 70 پايىزدان استامى كومىر ەلەكتر ستانسالارىنا تاۋەلدى. وسىعان وراي، ەنەرگيا ءوندىرىسىن ارتتىرۋمەن بىرگە، ونىڭ ەكولوگياعا تيگىزەتىن زيانىن ازايتۋدىڭ ماڭىزدىلىعى ايتىلدى. بۇل رەتتە اتوم ەلەكتر ستانسياسىن سالۋ ەڭ ءتيىمدى شەشىمدەردىڭ ءبىرى رەتىندە قاراستىرىلۋدا.
شتاب مۇشەلەرى «پريرەچنوە اگروفيرماسى» ج ش س بازاسىندا وبلىستاعى اۋىلشارۋاشىلىق ونىمدەرىن وندىرۋشىلەرمەن كەزدەسۋ وتكىزدى. سونىمەن قاتار، «ەيكوس» ج ش س كاسىپكەرلەرىمەن جانە قىزمەتكەرلەرىمەن، سونداي-اق كوممۋنالدىق سەكتور كاسىپورىندارىنىڭ ۇجىمدارىمەن دە كەزدەسۋلەر ۇيىمداستىرىلىپ، اتالعان ماسەلەلەر كەڭىنەن تالقىلاندى.
«مەملەكەت باسشىسى قاسىم-جومارت توقايەۆتىڭ باستاماسىمەن 6 قازاندا قازاقستاندا اەس سالۋ ماسەلەسىنە قاتىستى رەسپۋبليكالىق رەفەرەندۋم وتەدى. اتوم ەلەكتر ستانسياسى – كومىرقىشقىل گازىنىڭ شىعارىندىلارىن جانە كومىرگە تاۋەلدىلىكتى ازايتۋدىڭ ەڭ ءتيىمدى جولدارىنىڭ ءبىرى. اەس-تىڭ كومىر ەلەكتر ستانسيالارىنان ايىرماشىلىعى زور. اتوم ەنەرگەتيكاسى قورشاعان ورتانى ۋلى گازدارمەن، كۇلمەن نەمەسە زياندى قالدىقتارمەن لاستامايدى. بۇل – اتوم ەنەرگياسىنىڭ تابيعاتقا زيان كەلتىرمەي، ەلىمىزدىڭ ەكونوميكاسىن دامىتۋعا سەرپىن بەرەتىن تازا جانە تۇراقتى ەنەرگيا كوزىمەن قامتاماسىز ەتۋ دەگەن ءسوز»، – دەپ اتاپ ءوتتى ماۋلەن اشىمبايەۆ.