كسرو اسكەرىنىڭ اۋعانستان جەرىنەن شىعارىلعانىنا بيىل 35 جىل تولدى. اۋعان سوعىسى تاريح بەتتەرىندە وزىندىك ءىز قالدىردى.
اتاۋلى كۇنگە وراي، جۋىردا الماتى قالاسى ۇيلەستىرۋ كەڭەسى جانە «كوك بايراق» ارداگەرلەر قوعامدىق بىرلەستىگىنىڭ ۇيىمداستىرۋىمەن اۋعان سوعىسىنىڭ ارداگەرلەرى سالتاناتتى تۇردە باس قوستى. الماتىداعى 28 گۆارديالىق پانفيلوۆشىلار ساياباعىنداعى سوعىس قۇرباندارىن ماڭگى ەستە ساقتاۋ ماقساتىندا قويىلعان «ماڭگىلىك الاۋ» مەموريالى ماڭىنا جينالىپ، مايدانداس دوستارىنىڭ قۇرمەتىنە گۇل شوقتارىن قويدى، جاۋىنگەرلەردىڭ ەرلىگى تۋرالى ەستەلىكتەر ايتىلدى. جات ەلدە، جات مەكەندە جاۋ وعىنان قازا تاپقان مايدانداس جاۋىنگەرلەردى ءبىر مينۋت ۇنسىزدىكپەن ەسكە الدى. ارداگەرلەر اۋعان سوعىسى جاۋىنگەرلەرىنە قويىلعان ەسكەرتكىش الاڭىنا توپتاسىپ، قارۋلاس باۋىرلارىنا تاعزىم ەتتى. سونداي-اق قايتىس بولعان تاعدىرلاس باۋىرلارىنا ورتالىق مەشىتتە قۇران باعىشتاپ، شاراعا ارنايى شاقىرىلعان جاۋىنگەرلەردىڭ اتا-انالارىنا جۇباتۋ ايتىپ، جىلى لەبىز ءبىلدىردى.
سالتاناتتى بولىمنەن كەيىن شارا «ەر ەسىمى – ەل ەسىندە» اتتى كونسەرتتىك باعدارلاماعا ۇلاستى. الماتى قالاسى اكىمدىگىنىڭ قولداۋىمەن «الاتاۋ» ءداستۇرلى ونەر تەاترىندا وتكەن كونسەرتتى 600-گە جۋىق كورەرمەن تاماشالادى. كونسەرتتە اۋعان ارداگەرلەرىنىڭ «پاندجشەر» توبى، قازاقستاننىڭ حالىق ءارتىسى رامازان ستامعازى باستاعان مادەنيەت قايراتكەرلەرى مەن ت.جۇرگەنوۆ اتىنداعى ونەر اكادەمياسىنىڭ ستۋدەنتتەرى، ب.ە.حاسانعالييەۆ باسشىلىق ەتەتىن پ.چايكوۆسكيي اتىنداعى الماتى مۋزىكالىق كوللەدجىنىڭ جاستارى، سونىمەن قاتار سوعىس ارداگەرلەرىنىڭ ۇل-قىزدارى ونەر كورسەتتى.
شارا بارىسىندا وقۋ ورىندارىندا ارداگەرلەرمەن كەزدەسۋلەر ۇيىمداستىرىپ، جاستاردى وتانسۇيگىشتىككە باۋلۋعا، پاتريوتتىق تاربيە بەرۋگە ۇلكەن ۇلەس قوسىپ جۇرگەن ءبىرقاتار كاسىپتىك-تەحنيكالىق جانە ورتا ءبىلىم بەرۋ مەكەمەلەرىنىڭ باسشىلارى، ارداگەرلەر ەمحاناسى مەن اۋرۋحانا باسشىلارى، ب ا ق وكىلدەرى العىس حاتپەن ماراپاتتالىپ، ارداگەرلەرگە قورسەتىپ جاتقان كومەك-قولداۋلارىنا العىس ايتىلدى. كونسەرتكە قاتىسۋشىلار ارداگەرلەرگە قۇرمەت كورسەتە وتىرىپ، دەنەگە تۇسكەن جارا ۋاقىتتىڭ وتۋىمەن جازىلار بولسا، جۇرەككە تۇسكەن سىزدىڭ ەشقاشان جازىلمايتىنىن، ەرلىك ۇمىتىلمايتىنىن جەتكىزدى.
«وتان ءۇشىن كۇرەس – ەرگە تيگەن ۇلەس». حالقىمىزدىڭ وسى دانالىعى قاشاندا جۇرەك داپتەرىندە، سانا ساحناسىندا ساقتاۋلى بولسا، جاس ۇرپاق ازاماتتىق پارىزىنا ادال بولارى انىق. ەلىمىز قاھارمان ۇلدارىن قاشاندا پانا تۇتقان، اۋعان سوعىسى قاھارماندارىن قادىرلەپ، قۇرمەتتەۋى دە – سونىڭ ايعاعى.
وتەر جىلدار، ايلار تاعى الىستاپ،
تاعدىر تالاي تاۋقىمەتىن تابىستار.
وزدەرىڭدى جىرلاپ وتەر ۇرپاعىڭ،
اۋعانداعى ازاپ شەككەن ارىستار!..
راسىمەن دە، ءومىر توقتامايدى، ەرلىك ولمەيدى، جىلدار جالعاسا بەرەدى. بۇعان دالەل – بۇگىنگى ورتامىزدا جۇرگەن اۋعاندىق جاۋىنگەرلەرىمىز. ولاردىڭ بەيبىت ومىردەگى جارقىن ىستەرى، قوعامدىق جۇمىستاعى بەلسەندىلىكتەرى، ءتۇرلى كاسىپ سالاسىنداعى جەتىستىكتەرى ەل ماقتانىشى ەكەنى داۋسىز. سول ءبىر وتتى جىلدارى اۋعان جەرىندە قارۋ اسىنىپ، تۋعان ەلگە دەگەن ساعىنىش پەن سوعىس تاۋقىمەتىن ارقالاي ءجۇرىپ، ءبىرىن ءبىرى باۋىر دەسكەن ازاماتتار ايتۋلى كەشتە قۇشاقتارى ايقاسىپ، قۋانىشپەن قاۋىشتى. باقيلىق بولعان قارۋلاس دوستارىن ەسكە الىپ، رۋحىنا تاعزىم ەتتى.
كەڭەس اسكەرىنىڭ اۋعانستان جەرىنەن شىعارىلۋىنا 35 جىل تولۋىنا جانە ينتەرناسيوناليست-جاۋىنگەرلەردى ەسكە الۋعا ارنالعان مەرەكەلىك شارانى ۇيىمداستىرۋعا قولداۋ كورسەتكەن الماتى قالاسى اكىمدىگىنە، الاتاۋ اۋداندىق مادەنيەت بولىمىنە، قازاقستاننىڭ مادەنيەت قايراتكەرلەرىنە، جاس ونەرپازدارعا الماتى قالاسى ۇيلەستىرۋ كەڭەسى، «نامىس » جانە «كوك بايراق» ارداگەرلەر قوعامدىق بىرلەستىگى العىس ءبىلدىردى.