تۇركىستان وڭىرىندەگى توعىز ادام جان تاپسىرعان جويقىن جول اپاتى تۋرالى بۇكىل ەل قۇلاعدار بولدى.
سول جانتۇرشىگەرلىك اپاتتان امان قالىپ، ەشقانداي مەديسينالىق كومەككە جۇگىنبەگەن ەكى ازاماتتىڭ ءبىرى – مۇرات ەسەنقابىلوۆ جانىپ جاتقان كولىكتەردىڭ ىشىنەن سەگىز ادامدى كوتەرىپ الىپ شىققان، دەپ حابارلايدى Almaty-akshamy.kz
ول تۇركىستان وبلىسى سوزاق اۋدانىنا قاراستى باباتا اۋىلىنىڭ تۇرعىنى.
"توعىز ادام كوز الدىمدا جان تاپسىردى. ۇشەۋى مىلجا-مىلجاسى شىققان كولىكتىڭ ىشىندە قىسىلىپ، شىعا الماي، جانىپ كەتتى. قايسىسىن قۇتقارارىمدى بىلمەدىم. جانىپ جاتقان كولىكتەردىڭ ىشىنەن سەگىز ادامدى كوتەرىپ الىپ شىقتىم. كەيىننەن كەلگەن ادامدار جانىپ جاتقان كولىككە جاقىنداۋعا سەسكەنىپ تۇردى. سەبەبى، جانىپ جاتقان كولىكتىڭ جانارماي باگى كەز-كەلگەن ساتتە اتىلىپ كەتۋى مۇمكىن ەدى. ىڭىرسىپ جىلاپ، كەيبىرى ەسىن بىلمەي جاتقان، دارمەنسىز جارالىلاردى كولىكتەن كوتەرىپ شىعارىپ، كەزەڭ-كەزەڭىمەن جول جيەگىنە ءقاۋىپسىز جەرگە تاسىدىم"، - دەيدى مۇرات.
بۇل تۋرالى اقىن مارالتاي رايىمبەك ۇلى فب پاراقشاسىنا: «قازاقستان رەسپۋبليكاسىنىڭ بيلىگى وسىناۋ وقيعانىڭ تەرگەۋ جۇمىستارىن ءوز تاراپىنان قاتاڭ قاداعالاۋعا الىپ، ءادىل ساراپتاما، وڭ شەشىم شىعۋىن قامتاماسىز ەتۋمەن قاتار: "ەر جولداسى – تاۋەكەل!" - دەپ، ەش ويلانباستان، كوزسىز باتىرلىققا بارعان مۇرات ەسەنقابىلوۆ سىندى ءبىرتۋار ازاماتتىڭ ەرلىگىن ەسكەرسە ەكەن. قازىرگىدەي، اكە بالاعا، اعا ىنىگە، حالىق بيلىككە، قۇل قۇدايىنا سەنۋدەن قالعان زاماندا ەلدىڭ جۇرەگىن جىلىتىپ، وسكەلەڭ ورەندەرگە ونەگە بولار مۇراتتارىمىز كوپ ەمەس قوي... جەلتوقسان مەن قاڭتاردا قانشا قازاقتىڭ وبالىنا قالدىق. ونىڭ دا سۇراۋى بولار كۇن تۋارى – انىق. تاعى ءبىر انىق بار: "ەر ءقادىرىن بىلمەگەن، ەل ءقادىرىن بىلمەيدى!»، دەپ جازدى.