الماتىدا «جايلى مەكتەپ» ۇلتتىق جوباسىن ىسكە اسىرۋ اياسىندا 37 مىڭنان استام وقۋشى ورنى قۇرىلادى، دەپ حابارلايدى almaty-akshamy.kz
الماتىدا «جايلى مەكتەپ» ۇلتتىق جوباسىنىڭ ىسكە اسىرىلۋ بارىسى قالا اكىمى ەربولات دوسايەۆتىڭ، ورىنباسارلارىنىڭ، قالا اۋداندارى اكىمدەرىنىڭ، باسقارمالارى باسشىلارىنىڭ، «الماتىباسجوسپار» عزي» ج ش س، «Samruk-Kazyna Construction» اق جانە ت.ب. وكىلدەردىڭ قاتىسۋىمەن وتكەن جيىندا تالقىلاندى.
جاڭا 22 مەكتەپ 37 100 وقۋشى ورنىمەن قامتاماسىز ەتەدى – ولاردىڭ قۇرىلىسى قالانىڭ ءارتۇرلى اۋدانىندا جوسپارلانعان. اكىمدىك قالانى ءبىلىم بەرۋ مەكەمەلەرىمەن قامتاماسىز ەتۋدىڭ 3 تەتىگىن پايدالانادى: مەملەكەتتىك تاپسىرىس، جەر تەلىمى يەلەرى سالعان مەكتەپتى دايىن بولعاندا ساتىپ الۋ جانە مەملەكەتتىك-جەكەمەنشىك ارىپتەستىك اياسىنداعى قۇرىلىس.
مەملەكەتتىك بيۋدجەت ەسەبىنەن 23 100 وقۋشىعا ارنالعان 13 مەكتەپ جانە تاعى 8 مەكتەپ (12 مىڭ ورىندىق) سالىنادى، الماتى اكىمدىگى مەنشىك يەلەرىنەن دايىن مەكتەپتى ساتىپ الادى. العاباس شاعىن اۋدانىندا 2000 وقۋشىعا ارنالعان مەكتەپ مەملەكەتتىك-جەكەمەنشىك ارىپتەستىك نەگىزىندە بوي كوتەرەدى.
جوبانى ىسكە اسىرۋعا «Samruk-Kazyna Construction» اق جاۋاپتى. قازىرگى ۋاقىتتا مەملەكەتتىك قوردىڭ بالانسىنداعى 10 جەر ۋچاسكەنى قالا اكىمدىگى تاپسىرىستى ورىنداۋشىعا بەردى. ەكى ۋچاسكە قولدانىستاعى ەسكى مەكتەپ عيماراتتارىن (№97 جانە №154 ليسەي) بۇزعاننان كەيىن بەرىلەدى. الماتى اكىمى بۇزۋ ءراسىمىن 1 تامىزعا دەيىن اياقتاۋدى تاپسىردى. روزىباكييەۆ-ليەۆيتان كوشەلەرىنىڭ قيىلىسىنداعى تاعى 1 ۋچاسكەنى ساتىپ الۋ قۇنى بويىنشا مەنشىك يەسىمەن كەلىسسوزدەر جۇرگىزىلۋدە. سونىمەن قاتار، ولاردى 1 تامىزعا دەيىن اياقتاۋ جوسپارلانعان جانە ۋچاسكە «Samruk-Kazyna Construction» اق بالانسىنا بەرىلەدى.
قاعيدادا جەر تەلىمىنىڭ يەسى ەسەبىنەن ءبىلىم بەرۋ مەكەمەسىنىڭ عيماراتىن سالۋ جانە قاجەت بولعان جاعدايدا ينجەنەرلىك جەلىلەردى جۇرگىزۋ كوزدەلگەن. قازىرگى تاڭدا بارلىق ينۆەستورمەن ءتيىستى مەموراندۋمدارعا قول قويىلدى، قۇرىلىس جۇمىستارىن باستاۋ IV توقساندا جوسپارلانعان.
جيىن قورىتىندىسى بويىنشا قالا اكىمى ەربولات دوسايەۆ مەكتەپتەردىڭ قۇرىلىسىن ساپالى جۇرگىزۋ جانە ۋاقىتىلى پايدالانۋعا بەرۋ جونىندەگى باسقارمالاردىڭ جۇمىسىن جەدەلدەتۋدى تاپسىردى.