ەرلان قوشانوۆ قازاقستاننىڭ تۇكپىر-تۇكپىرىنەن كەلگەن ەڭ بەلسەندى ايەلدەرمەن، «AMANAT» پارتياسىنىڭ ايەلدەر قاناتى اياسىندا ۇيىمداستىرىلعان «Tomiris» جوباسىنىڭ قاتىسۋشىلارىمەن كەزدەستى. بۇل جۇزدەسۋدە 200-دەن استام ايەل ساياسي كوشباسشىلىقتى ۇيرەنىپ، ەل بولاشاعى ءۇشىن ماڭىزدى شەشىمدەر قابىلداۋعا ءوز ۇلەستەرىن قوسۋعا دايىن ەكەندىكتەرىن كورسەتتى.
ايەلدەر قاناتى ءبىر جارىم جىلدا «AMANAT» پارتياسىنىڭ نەگىزگى قوزعاۋشى كۇشتەرىنىڭ بىرىنە اينالدى. «Tomiris» جوباسىنا قاتىسۋشىلار جولداۋ قازىرگى سىن-قاتەرلەرگە جاۋاپ بەرەدى دەپ ءبىراۋىزدان كەلىستى. اسىرەسە، ەلىمىزدە بايقالىپ وتىرعان ەنەرگيا تاپشىلىعى ماسەلەسىن شەشۋدىڭ ەڭ ءتيىمدى جولى – اتوم ەلەكتر ستانسياسىن سالۋ ەكەنىن دە قولدادى.
كەزدەسۋگە قاتىسقان يادرولىق فيزيكا ينستيتۋتىنىڭ عىلىمي حاتشىسى قارلىعاش مۇناسبايەۆا مەن وسى ينستيتۋتتىڭ يادرولىق جانە فيزيكالىق قاۋىپسىزدىك وقۋ ورتالىعىنىڭ باستىعى ناتاليا يزمايلوۆا اتوم ەلەكتر ستانسياسىن سالۋدىڭ قاۋىپسىزدىگىنە قاتىستى عىلىمي تۇرعىدان ءوز ويلارىن ءبىلدىردى. ولاردىڭ ايتۋىنشا، بۇل جوبا ەكولوگيالىق تالاپتارعا تولىق جاۋاپ بەرەدى جانە جاڭا تەحنولوگيالاردىڭ ارقاسىندا قازاقستان حالقى ءۇشىن ەشقانداي ءقاۋىپ توندىرمەيدى.
ناتاليا يزمايلوۆا اتاپ وتكەندەي، قازاقستاندا اتوم ەنەرگەتيكاسى سالاسىندا جۇمىس ىستەيتىن جوعارى بىلىكتى مامانداردى دايارلاۋ ءۇشىن بارلىق بازا بار. جاس ۇرپاقتى يادرولىق ينجەنەريانى تاڭداۋعا جانە ەلىمىزدىڭ ەنەرگەتيكالىق تۇراقتىلىعى مەن قاۋىپسىزدىگىن قامتاماسىز ەتۋگە ۇلەس قوسۋعا شاقىرامىز.
سارقان اۋىلىنان كەلگەن كاسىپكەر كەنجەتاي تازابەكوۆا اەس قۇرىلىسى بويىنشا رەفەرەندۋم وتكىزۋ – «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ ناقتى كورىنىسى ەكەنىن اتاپ ءوتتى. جاڭارتىلعان كونستيتۋسياعا حالىق داۋىس بەرگەن كەزدە دە ءدال وسىلاي بولعان ەدى. ۋاقىت پەن وسى رەفورمالار تاڭداۋدىڭ دۇرىس بولعانىن كورسەتتى.
بۇل جولى دا بىرلەسىپ، تاعى ءبىر ورتاق، باتىل شەشىم قابىلداپ، ەلىمىزدە اتوم ەلەكتر ستانسياسىن سالۋعا داۋىس بەرۋىمىز كەرەك!