قازاقستاندا اتوم ەلەكتر ستانسياسىن (اەس) سالۋ ەلدىڭ اتوم يندۋسترياسىن دامىتۋعا جانە تۇتاستاي العاندا ەكونوميكاعا ۇلكەن مۇمكىندىك اشادى. بۇل تۋرالى "AMANAT" پارتياسىنىڭ قولداۋىمەن قۇرىلعان حالىقتىق شتابتىڭ وڭىرلەردە وتكىزىپ جاتقان ءتۇسىندىرۋ جۇمىستارى بارىسىندا ايتىلدى.
ءۇلبى مەتاللۋرگيالىق زاۋىتىنىڭ باس ينجەنەرى يگور كوروبەينيكوۆتىڭ ايتۋىنشا، اەس-تىڭ جۇمىسى كەز كەلگەن باسقا جىلۋ ەلەكتر ستانسياسىنا ۇقساس، تەك كومىرمەن جۇمىس ىستەيتىن قازاندىقتىڭ ورنىنا اتوم رەاكتورى قولدانىلادى.
"اەس تە جىلۋ ستانسياسى سياقتى بەلگىلى ءبىر كولەمدە سۋدى تۇتىنادى. سوندىقتان سۋدى پايدالانۋ تۇرعىسىنان بۇل باسقا جىلۋ ستانسيالارىنان ەرەكشەلەنبەيدى،" – دەيدى ول.
قازاقستاندا اەس سالۋ كومىرقىشقىل گازىنىڭ شىعارىندىلارىن 7 ميلليون تونناعا دەيىن ازايتۋعا مۇمكىندىك بەرەدى. سونىمەن قاتار، جاڭا جۇمىس ورىندارىن قۇرىپ، تۇراقتى جانە ارزان ەنەرگيامەن 60 جىلدان استام قامتاماسىز ەتەدى. بۇل ەلىمىزدىڭ ەنەرگەتيكالىق تاۋەلسىزدىگىنە قول جەتكىزۋدىڭ ماڭىزدى قادامى بولىپ تابىلادى.
حالىقتىق شتاب مۇشەسى امانباي نۇركەنوۆ اەس سالۋ ماسەلەسى سەنىمدى جانە ەكولوگيالىق تازا قۋات كوزدەرىنە دەگەن قاجەتتىلىكتەن تۋىنداعانىن اتاپ ءوتتى.
"بۇگىنگى تاڭدا ەلىمىزدىڭ وڭتۇستىك وڭىرلەرىندە ەلەكتر قۋاتىنىڭ تاپشىلىعى بايقالۋدا. ءبىز كورشى ەلدەردەن قوماقتى كولەمدە ەلەكتر ەنەرگياسىن ساتىپ الامىز. سوندىقتان اەس – ەنەرگيا تاپشىلىعىن شەشۋدىڭ نەگىزگى جولى،" – دەيدى نۇركەنوۆ.